Vai a sottomenu e altri contenuti

Sa domo chi non cheret isparire

In mesu a su lagu Omodeo, ammuntada dae s'abba, b'at una domo-pantasma. Cada tantu, cando non proet dae tempus meda, nd'essit a campu pro nàrrere a chie passat ''Deo m'agato ancora'': est sa domo de su capu de sa tzentrale elètrica.

S'istòria sua comintzat in su 1917 cando movent sos traballos pro fraigare su lagu artifitziale prus mannu de Europa, progetadu dae Angelo Omodeo e fraigadu dae Giulio Dolcetta, ambos duos ingegneris, pro sa produtzione de energia elètrica e pro dare abba a sas terras de Campidanu.

Pro imbàtere a s'iscopu est tocadu a nd'ispèrdere sas domos de Zuri, bidditzola de binti domos chi s'agataiat pròpiu in su tretu chi cheriat prenadu de abba. Sa bidda nde l'ant betada a terra, sa gente est emigrada a domos fraigadas a nou e sa cresiedda de Santu Pedru (meravìllia architetònica de istile romànicu-lombardu cun elementos gòticos, chi fiat in ie dae su 1291) l'ant ''ismontada'' e torrada a acaddare pedra subra pedra in sa Zuri noa.

A s'inauguratzione de sa diga prus manna de Europa, in su 1924, bi fiat finas su re.

Prus in bassu de sa diga b'ant fraigadu sa tzentrale idroelètrica e Ula est istada sa prima bidda de Sardigna chi at tentu sa lughe in sas domos.

Ma ''Onni òpera at fine'', comente narat su ditzu, e otanta annos a pustis (in su 1997) sa diga betza non bastaiat prus e ant inauguradu sa diga noa, prus arta e prus manna. Su livellu de s'abba est crèschidu ammuntende totu su chi bi fiat a inghìriu: sa foresta pietrificada, sas ruinas de Zuri e sa domo de sos dirigentes de sa tzentrale elètrica, chi però onni tantu nde bogat sa manu dae sa sepultura pro nàrrere a chie passat ''Deo nche so ancora''.

(GFP)

torna all'inizio del contenuto
torna all'inizio del contenuto