Vai a sottomenu e altri contenuti

Cun Iscol@, in Neoneli presentada s’iscola moderna

In Neoneli, su presidente de sa Regione Francesco Pigliaru - paris cun su Sìndigu de Neoneli Salvatore Cau - at presentadu su progetu Iscol@ chi pertocat s'iscola de sa bidda chi, collocada in sos locales de s'iscola elementare e in una domo istòrica, at a èssere collegada a su territòriu e adeguada a sas esigèntzias modernas de sos maistros e de sos alunnos. A sa presentada ant partetzipadu sos Sìndigos de sos Comunes de su Barigadu, su dirigente iscolàsticu Luca Tedde cun sos maistros e sos alunnos e su progetista Sebastiano Gaias.

Su progetu at tentu fintzas s'agiudu de sas ideas de sos pipios chi cun sos disegnos issoro ant manifestadu de chèrrere un'iscola moderna e bella.


At a èssere un'iscola primària pro sos pipios non de Neoneli ebbia ma fintzas de àteros Comunes de su Barigadu: Ardaule, Nughedu Santa Itòria, Bidoniu e Ula, chi ant reconnotu Neoneli comente riferimentu pro sos servìtzios de s'iscola primària siat pro sa tzentralidade sua e siat pro sas istruturas chi giai bi sunt.

In prus, essende sas biddas a pagu tretu, su prus, pagu prus de 8 chilòmetros, sas atividades extra didàticas s'ant a fàghere fintzas in sas àteras biddas, abarrende Neoneli sa sede de s'iscola primària difusa. Sa Regione ponet a disponimentu unu finantziamentu de unu millione e 500 mìgia èuros chi s'agiunghent a sos 400 mìgia èuros de su Comune de Neoneli. Sos duos annos de traballu postos in contu ant a incomintzare in su mese de làmpadas.


Sos traballos chi s'ant a fàghere in s'edifìtziu postu in sa carrera Iscanu (Scano), in ue sunt sas Elementares, ant a serbire pro otènnere - a intro e in foras - ispàtzios in funtzione de sa didàtica moderna e un'efitzèntzia energètica mègius.


S'idea est de pònnere in collegamentu s'iscola cun giassos educativos diferentes de sa bidda, comente sa biblioteca (comente logu de sos limbàgios e de s'ischire), su campu isportivu (comente una palestra manna), domo Nonnis (comente archìviu didàticu e espositzione de sos traballos de sos pipios), pratza Barigadu e pratza Itàlia (comente àulas in foras), sa sala comunale Corrale (pro sas rapresentatziones de teatru) e, in prus Domo Cherchi pro sas atividades de laboratòriu de didàtica aplicada. Cun su finantziamentu de Iscol@, Domo Cherchi at a èssere acontzada e at a èssere sa Domo de sas artes e de su fàghere (Casa delle arti e del fare), semper a intro de su tzircùitu iscolàsticu.


Sa Regione, cun Iscol@ (asse 2), in Barigadu at finantziadu fintzas traballos de manutentzione istraordinària in s'iscola mèdia de Ardaule.

(MM)

torna all'inizio del contenuto
torna all'inizio del contenuto