Vai a sottomenu e altri contenuti

Ite est una limba de minoria

Una limba de minoria est una limba faeddada dae persones chi in una sotziedade o istadu non sunt sos prus (sunt una parte de totu sa populatzione) e cussu istadu tenet un'àtera limba connota comente limba ufitziale.

Una matessi limba podet èssere ufitziale e de majoria in un'istadu e de minoria in un'àteru istadu; pro nàrrere: su frantzesu est sa limba ufitziale de sa Frantza ma est de minoria in Itàlia ca est faeddadu in Badde de Aosta.

In Itàlia giai sa Costitutzione amparat sas minorias linguìsticas; in s'artìculu 6 est iscritu: Sa Repùblica tutelat cun normas apòsitas sas minorias linguìsticas.

Solu in sas ùrtimas dies de su 1999, s'Istadu italianu cun s'intrada in vigore de sa lege n. 482 Normas in matèria de tutela de sas minorias linguìsticas istòricas, chi tutelat sa limba de sas populatziones albanesas, catalanas, germànicas, grecas, islovena, croatas e cussas chi faeddant su frantzesu, su francu-proventzale, su friulanu, su ladinu, s'otzitanu e su sardu, at aplicadu e respetadu s'artìculu 6 de sa Costitutzione.

Mancari fatzat ispantu, est cun sa lege 482 de su 1999, paritzos annos a pustis de s'intrada in vigore de sa Costitutzione, chi s'italianu est istadu decraradu limba ufitziale de sa Repùblica; difatis, no in sa prima lege de s'Istadu ma in cussa chi tutelas sas minorias linguìsticas, in s'artìculu 1, est iscritu: Sa limba ufitziale de sa Repùblica est s'italianu.

A favore de sas minorias linguìsticas b'est fintzas a Carta europea de sas limbas regionales e de minoria chi, in sos artìculos 7 e 8, faghet propostas de comente tutelare custas limbas:

1) agiudare e/o incoragire s'impreu orale o iscritu de sas limbas regionales o de minoria in sa vida pùblica e privada;

2) totu sos chi faeddant variantes linguìsticas sìmiles depent collaborare a pare;

3) tocat a tènnere a disponimentu formas e mezos adeguados pro insegnare e istudiare sas limbas regionales o de minoria;

4) sos chi non faeddant una limba regionale o de minoria, chi bivent in su logu in ue s'impreat cussa limba, si dda cherent imparare depent tènnere a disponimentu sos mezos pro ddu fàghere;

5) tocat a organizare servìtzios iscolàsticos pro insegnare sas limbas de minoria a ogni livellu;

6) est de importu sa promotzione de sas limbas de minoria in s'impreu legale;

7) est de importu s'impreu de sas limbas de minoria in in sos mezos de comunicatzione.

(MM)

torna all'inizio del contenuto
torna all'inizio del contenuto