Vai a sottomenu e altri contenuti

Avisos e àutos in limba sarda de su Comune de Ula

SELETZIONE PRO N.2 TIROTZÌNIOS FORMATIVOS IN SU COMUNE DE ULA
AVISU PÙBLICU PRO SA MANIFESTATZIONE DE INTERESSE A LEARE PARTE A SA PROTZEDURA PRO S'AFIDAMENTU DE SU SERVÌTZIU DE PULITZIA DE SOS IMMÒBILES COMUNALES PRO SU 2020-2021 (DAE SU 1 DE TRÌULAS DE SU 2020 A SU 31 DE NADALE DE SU 2021)

S'AVISU est publicadu in su situ de su Comune de Ula dae in ue si nde podet iscarrigare fintzas su mòdulu pro presentare sa domanda.

A.F.

AVISU - INFORMATZIONES IMU NOA

Totu sas informatziones in contu de s'IMU noa (iscadèntzias, ratas e alicuotas) ddas agatades in su depliant publicadu in su situ de su comune.

IMU 2020

A.F.

Ordinàntzia de su Sìndigu n. 2 de su 2020

OGETU: pulitzia de sos terrinos, ortos, giardinos dae istula, erba mala e molas de ispina pro motivos de salude pùblica, seguresa urbana, igiene e sanidade.

Su sìndigu de Ula cun s'ordinàntzia n.2 de su 2020 bidas e leadas in cunsideru totu sas leges in vigore, s'Istatutu Comunale, sa Delìberas de sa Giunta Regionale pro sas prescritziones regionales contra a sos fogos, sas normativas sanitàrias
Dat òrdine chi
Dae sa prima die de làmpadas a su 31 de santugaine 2020 non si fatzat pàschere su bestiàmene a intro de sa bidda e intro de 100 metros dae s'ùrtima domo de sa periferia de sa bidda
Si podet atraessare sa bidda solu pro nche cambiare su bestiàmene dae unu giassu in bassura pro nche ddu pigare prus a in artu e a s'imbesse, passende in sa tzircumvallatzione chi andat a Neoneli, in via Dante pighende cara a Neoneli e in via Cagliari calende cara a Busache.

A INTRO, E NON A PUSTIS, DE SA PRIMA DIE DE LÀMPADAS
Sos meres de terrinos chi non sunt postos a sèmene e chi ferint a intro de sa bidda sunt obligados

Sighi a lèghere

A.F.

Bandu pro assignare contributos in agiudu de chie tenet cuntratos de afitu -Lege 431/98

Su tempus pro presentare sas domandas iscadit su 20 de maju 2020 a sa una (h.13.00).


AVISU PÙBLICU
SI FAGHET A ISCHIRE A TOTU SOS INTERESSADOS CA

A SOS SENSOS DE SA LEGE 431 DE SU 9 DE NADALE1998 ART.11 E DE SU D.M. DE SOS TRABALLOS PÙBLICOS DE SU 7 E LÀMPADAS 1999 SUNT ABERTOS SOS TÈRMINES PRO PRESENTARE SAS DOMANDAS PRO TÈNNERE CONTRIBUTOS INTEGRATIVOS PRO PAGARE S'AFITU DE DOMO. ANNUALIDADE 2020 MESES DE GHENNÀRGIU-ABRILE

PODENT PRESENTARE DOMANDA DE CONTRIBUTOS INTEGRATIVOS PRO SU 2020 TOTU SOS CHI, SA DIE CHI FAGHENT DOMANDA:
-tenent unu cuntratu de afitu registradu in manera regulare, de domos a usu residentziale de propiedade privada chi sunt in sos Comunes de s'Unione de Barigadu e in ue bivent comente domo printzipale o esclusiva, bastet chi s'afitu non siat pro domos chi intrant in sas categorias de su catastu A1, A8 e A9;

-sunt titulares de unu cuntratu de afitu pro usu residentziale de domos de propiedade pùblica, destinadas a locatzione permanente, comente narat su Decretu de su Ministeru de sas infrastruturas n.2523 de su 27 de nadale 2001, chi sunt in sos Comunes de s'Unione de Barigadu e in ue bivent comente domo printzipale o esclusiva.

DEPENT TÈNNERE UN ISEE (Indicadore de Situatzione Econòmica Ecuivalente) de su nùcleu familiare chi chi rientrat in sa FÀSCIA A o in sa FÀSCIA B (abbàida s'avisu allegadu)

SOS INTERESSADOS PODENT ABBAIDARE SU BANDU PUBLICADU IN S'ALBU PRETÒRIU ON LINE DE S'UNIONE DE SOS COMUNES DE BARIGADU E IN SOS SITOS INTERNET DE SOS COMUNES ASSOTZIADOS E PRESENTARE DOMANDA INTRO E NON A PUSTIS DE SA UNA (h.13.00) DE SU 20 DE MAJU 2020 IN SOS MÒDULOS DISPONÌBILES IN SOS UFÌTZIOS COMUNALES DE SOS COMUNES DE S'UNIONE, IN SOS ORÀRIOS DE ABERTURA A SU PÙBLICU.


S'Avisu 2020 e su mòdulu de domanda sunt publicados e si nde podent iscarrigare dae su situ istitutzionale de su Comune de Ula.

A.F.

BURSA DE ISTÙDIU NATZIONALE IN FAVORE DE SOS ISTUDIANTES DE SAS ISCOLAS SEGUNDÀRIAS DE SEGUNDU GRADU - D.LGS 13/04/2017 N.63
ANNU ISCOLÀSTICU 2019/2020

A V I S U

SI FAGHET A ISCHIRE A SA TZITADINÀNTZIA CA SI PODET PRESENTARE DOMANDA PRO TÈNNERE SA BURSA DE ISTÙDIU NATZIONALE PRO SOS ISTUDIANTES DE SAS ISCOLAS SEGUNDÀRIAS DE SEGUNDU GRADU, ISTATALES E PARITÀRIAS, PRO S'ANNU ISCOLÀSTICU 2019/2020.

PRO PRESENTARE SA DOMANDA PRO SA BURSA DE ISTÙDIU TOCAT A:


1.èssere iscritos pro s'annu iscolàsticu 2019/2020 a un' iscola segundària de segundu gradu de su sistema natzionale de istrutzione (iscolas istatales e paritàrias).

2.èssere in una famìlia chi tenet una Situatzione Econòmica Ecuivalente (I.S.E.E.) chi torrat in sos 14.650,00 èuros.

3.Compilare su mòdulu de domanda e allegare custos documentos:
•fotocòpia de s'atestatzione de s'ISEE in cursu de valididade lassadu a sos sensos de sa normativa previdida dae su DPCM n.159/2013;
•fotocòpia de su documentu de reconnoschimentu de chie faghet domanda in cursu de valididade.

4.Presentare sa domanda a su Comune de residèntzia - Ufìtziu Protocollo -intro de sa una (h.13,00) de su 15 de LÀMPADAS 2020. Podet presentare sa domanda unu genitore, su rapresentante legale de s' istudiante o s' istudiante e totu si tenet sos 18 annos fatos.

5.Sa domanda si nche podet mandare fintzas in sa posta eletrònica tzertificada e/o ordinària (segundu cantu detzidet su comune) a custu indiritzu: comune.ulatirso@legalmail.it. Su comune s'at a incurare de nche mandare s'elencu de sos istudiantes ammìtidos a sa Regione Sarda, chi at a aprontare una graduatòria ùnica regionale, fata cumintzende dae s'ISEE prus bassu e creschende, in casu de ISEE totunos, intrat in antis s'istudiante prus giòvanu. S'elencu de sos istudiantes chi ant a èssere in graduatòria, est a nàrrere cussos chi ant a retzire sa bursa de istùdiu, nch'at a èssere mandadu a su Ministeru de s'Istrutzione Pùblica. A sos chi ispetat sa bursa de istùdiu ant a retzire unu bonìficu domitziliadu e su Ministeru de s'Istrutzione at a istabilire cando e comente. Sa bursa de istùdiu est de 200 èuros onniuna.

INFORMATIVA PRIVACY - Su Ministeru de s'Istrutzione at aprontadu s'informativa pro sa privacy chi agatades publicada in su situ de su Comune www.comune.ulatirso.or.it e in su situ de su Ministeru: https://iostudio.pubblica.istruzione.it/web/guest/voucher.


MODULÌSTICA E INFORMATZIONES - Sa modulìstica chi si depet usare est disponìbile in su situ de sa Regione Sarda: www.regione.sardegna.it, e in su situ de su Comune: www.comune.ulatirso.or.it e in s' Ufìtziu de su Servìtziu Sotziale


Pro totu sas informatziones:

COMUNE - Ufìtziu: Servtziu Sotziale Dies e oràriu de abertura: Lunis, martis e chenàbura

Telèfono: 0783 61000 E-mail sociale@comune.ulatirso.or.it -PEC comune.ulatirso@legalmail

MINISTERU DE S'ISTRUTZIONE situ web https://iostudio.pubblica.istruzione.it/web/guest/vouchere mail iostudio@istruzione.iulatirso.it

Ula, su 5 de maju 2020

SU SÌNDIGU

Ovidio LOI

A.F.

AVIS INTERCOMUNALE: DONATZIONES DE SÀMBENE IN ULA

Chenàbura su 8 de maju 2020 dae sas oto de mangianu a mesudie (8.00/12.00) in Pratza IV Novembre in Ula Tirso s'at a pòdere dare su sàmbene. Pro fàghere a mancu de bènnere a pare cun gente meda e de aspetare tropu, si cheres bènnere a dare su sàmbene ti domandamus su praghere de ti prenotare mandende unu messàgiu cun s'iscrita 'SI' a custu nùmeru 327.8591838 e narende finas s'ora chi ti diat pòdere andare mègius a bènnere. As a retzire a pustis sa cunfirma cun un àteru sms.
Regordamus ca si podet essire pro lòmpere a dare su sàmbene. T'ant a dare guantos e mascarina in su respetu de totu sas normas anti COVID.

A.F.

SA DIE, su Presidente de sa Regione Solinas: sa Sardigna si nde torrat a pesare pro torrare a cumintzare.

Casteddu su 28 de abrile 2020,

Sa die de sa Sardigna


Su Presidente de sa Regione, Christian Solinas, at faeddadu totu in sardu in Cussìgiu Regionale, in ocasione de sa festa de sa die de sa Sardigna, sa festa de su pòpulu sardu, chi ocannu, comente at nadu su presidente Solinas, tenet unu significadu prus mannu ancora ca cheret nàrrere a torrare a cumintzare. Ocannu tenet unu significadu simbòlicu: comente unu tempus nch'amus catzadu sos opressores oe nche devimus catzare su virus cumbatende totu paris custa gherra pro torrare a sa vida nostra.
'Custa die dat s'oportunidade de nche barigare s' alabàntzia de su ritu, chi sunt importantes, eja, in sa vida de s'òmine: est sa die de nois sardos, de sa Sardigna! Una data nòdida, gasi comente ant ammentadu in medas de unu fatu istòricu, de cussèntzia natzionale, de fràigu de unu esperimentu autonomìsticu acumpridu a pustis dae sèculos de s'edade giuigale in armonia cun sas ideas rivolutzionàrias e illuministicas resumidas in sos printzìpios universales de sa libertade, , uguagliàntzia e amistade.
S'atualidade de sos valores identitàrios de sa Die si medit oe cun unu tempus particulare chi ponet domandas noas e nos presentat trintzeras noas pro gherrare contra a una pandemia traitora e mortale cun unu virus chi est curfinde a manera ferotze sa vida fitiana nostra, de sos antzianos nostros e non de issos ebbia. Una epidemia, chi semus cuntrastende a petorra parada cun mesuras poderosas pro li pònnere làcana, chi at custrintu pro chidas meda totu sos sardos a sacrifìtzios mannos meda, chi sunt ponende in pelea sas impresas nostras, sos traballadores, su setore econòmicu e produtivu. In custu tempus su meledu nostru pro sa Die Si prenat de cabias noas e leat una dimensione simbòlica chi forrogat sa capatzidade nostra de poderare, de èssere fortes e invocat in s'identidade de su pòpulu nostru sa capatzidade de si nche torrare a pesare e torrare a cumintzare lassende.si a palas cust'àtera tragèdia de s'istòria' L'amus iscritu: sa Sardigna est prus forte, nois poderamus sa fortza nostra totus impare pro torrare a cumintzare.''

Pro ascurtare su discursu de su Presidente Abbàida su vìdeo

Leghe su discursu de su Presidente

A.F.

Emergèntzia Coronavirus (COVID - 19) - Su Presidente de su Cussìgiu de sos Ministros at firmadu su DPCM de su 26 de abrile 2020

Su Presidente de su Cussìgiu de sos Ministros, Giuseppe Conte, su 26 de abrile 2020 at firmadu su DPCM nou chi istabilit totu sas mesuras pro cuntènnere s'emergèntzia dae Covid-19 in sa chi ant numenadu 'FASE 2'.
Sas dispositziones de su decretu ant a èssere aplicadas dae su 4 de su mese de maju 2020 (a su postu de cussas de su DPCM de su 10 de abrile 2020) e ant a bàlere fintzas a su 17 de maju 2020, francu su chi previdit s'art. 2, commas 7, 9 e 11 chi s'ant a aplicare dae su 27 de abrile 2020 cun totu sas àteras dispositziones de su DPCM de su 10 de abrile 2020.
S'ant a sighire a aplicare sas mesuras de cuntenimentu prus restritivas chi ant adotadu sas Regiones, in cuntzertu cun su Ministru de sa Salude, in àreas ispetzìficas de su territòriu regionale.
Sas novidades de su DPCM de su 26 de abrile, chi su Premier Conte at presentadu domìniga sero in cunferèntzia istampa, sunt medas. In custu decretu nou su Guvernu cheret istabilire sas mesuras chi ant a èssere ativas dae su 4 de maju 2020 e pro sas duas chidas in vatu.

Ite narat su decretu nou?

In custa segunda fase, est importante meda su de respetare semper sa distàntzia sotziale tra pare e cussu de si pònnere semper sos dispositivos de protetzione individuale, est òbligu a portare sas mascarinas in sos mezos pùblicos.

Abarrat s'òbligu de presentare s'autotzertificatzione -chi at a èssere agiornada- pro si mòvere a intro de sa matessi Regione de apartenèntzia, semper e solu pro motivos de traballu, netzessidade, salude e dae su 4 de maju fintzas pro lòmpere a bisitare parentes/familiares, sentza èssere in medas e semper cun s'òbligu de si pònnere sa mascarina. Si podet essire foras dae sa pròpia Regione pro traballu, salude, urgèntzias e pro torrare a sa pròpia residèntzia o domitzìliu.

Pro torrare in Itàlia: chie arribat in Itàlia depet dare a su vetore de s'imbarcu una dichiaratzione in ue est iscritu pro ite est viagiende e s'indiritzu de in ue at a andare a istare pro respetare, mancari siat asintomàticu, sas 14 dies de isulamentu fidutziàriu, faghende ischire immediatu sa presèntzia sua a su Dipartimentu de preventzione de sa Asl. Sas matessi règulas depet respetare chie isbarcat dae sas naves de crotziera;

Su DPCM nou istabilit s'òbligu de abarrare acorradu in domo e de avisare a su dotore suo a chie tenet sìntomos respiratòrios e portat callentura a prus de 37 e mesu.

Torrant a abèrrere parcos, giardinos e villas, faghende semper atentzione a respetare sa distàntzia mìnima de seguresa e a non èssere unu muntone de gente totu paris: in su decretu ddu est iscritu ca su Guvernu lassat a sos sìndigos sa possibilidade de detzìdere si abèrrere o sighire a lassare serrados sos parcos si non sunt in cunditzione de garantire chi siant respetadas sas normas de seguresa.

Atividade isportiva e motòria: pro ambas duas su decretu previdit ca dae su 4 de maju si potzant fàghere istesiende.si dae prus de 200 metros dae sa pròpia domo. Pro s'atividade isportiva tocat a respetare sa distàntzia de 2 metros tra pare, pro cussa motòria de 1 metru. Sos atletas professionistas de isport individuales podent torrare a cumintzare sos allenamentos, a sa sola e a ghennas serradas, giai dae su 4 de maju, pro sos isport de iscuadra sos allenamentos podet cumintzare dae su 18 de su mese chi intrat.

Un àtera novidade manna in contu de tzerimònias religiosas est cussa de torrare a abèrrere sas crèsias pro sos interros, chi si esseret possìbile diat èssere mègius a fàghere in foras, non ddoe podent leare parte prus de 15 persones intre sos parentes de primu e segundu gradu.

Semper a cumintzare dae su 4 de maju sas atividades de ristoratzione, chi giai nche podiant leare sos òrdines a domitzìliu, podent abèrrere pro chie cheret andare in persone a in ie a si nde retirare sa cosa de papare de si nche leare a domo o a su logu de traballu. Est òbligu a respetare sa distàntzia de unu metru tra pare, a non si firmare in sos locales pro papare e non abarrare firmos in dae nantis de sos esertzìtzios cummertziales o in ie a canta.

A cumintzare dae su 4 de maju su decretu nou permitit de torrare a cumintzare a traballare a su setore de sa manifatura, a cussu edile, de intermediatzione immobiliare paris a totu cussas atividades a s'ingrosso ligadas a custos setores. Dae su 27 de abrile custas categorias podent giai cumintzare a fàghere totu su netzessàriu pro si preparare a torrare a abèrrere: sanificatzione de sos locales e abarrat semper s'òbligu de respetare sas règulas giai in vigore in matèria de seguresa in su traballu.

Sighint a abarrare serradas sas iscolas de ònnia òrdine e gradu chi s'ant a sighire a ativare cun sa didàtica a distàntzia.


In fines tocat a nàrrere ca custu ùrtimu decretu at istabilidu unu protzessu de controllu e coordinamentu intre s'Istadu e sas Regiones pro tènnere contu de sos efetos pro àere allenadu sas mesuras restritivas ''Nos assumimus sos rischios de torrare a abèrrere -at naradu su Presidente Conte- ma tocat a leare totu sas precautziones netzessàrias''

E at naradu fintzas ca:

' [...] Gràtzias a sos sacrifìtzios fatos finas a como nche semus resurtados a cuntènnere sa difusione de sa pandemia e custu est una cosa manna cunsiderende ca in sa fase prus mala amus tìmidu de non pòdere controllare prus nudda. Ais tentu totus fortza, coràgiu, sensu de responsabilidade e sensu de comunidade. Como cumintzat pro totus sa fase in ue tocat a bìvere paris a su virus e depimus pònnere in contu ca in custa fase noa, sa fase 2, podet èssere chi sa curva de sos contàgios nche torret a pigare in carchi tretu de sa natzione. Tocat a ddu nàrrere craru ca custa cosa podet capitare! In custa fase 2 est ancora prus importante a mantènnere sa distàntzia sotziale fintzas in sa matessi famìlia.'

Inoghe su testu cumpletu de su DPCM de su 26 de abrile 2020

Abbàida sa Cunferèntzia Istampa de su Presidente Conte

A.F.

AVISU

Cambiados sos tèrmines pro presentare sas domandas pro su REIS (fundos regionales)

Si faghet a ischire a totu sos interessados ca sa determinatzione n.114 de su 6 de abrile 2020 de su Responsàbile de su Servìtziu Sotziale Assotziadu est istada retificada, su tempus pro presentare sas domandas pro atzèdere a sos cuntributos de su Programma Regionale REIS 2019/2020 iscadit su 15 de maju 2020 a sa una (h.13.00). Sas domandas cherent presentadas compilende su mòdulu publicadu in su situ istitutzionale de su comune chi agatades finas inoghe.


Retìfica determinatzione n.114 de su 6 de abrile 2020

Mòdulu de domanda

A.F.

Domandas frecuentes (FAQ) Lege Regionale n.12 de su 8 de abrile 2020

Agiornamentu Bandu Lege Regionale n.12 de su 8 de abrile 2020 'Mesuras istraordinàrias e urgentes in agiudu a sas famìlias pro parare fronte a s'emergèntzia econòmicu-sotziale nàschida dae sa pandemia de SARS-CO V2'
Inoghe in suta su link pro intrare a bìere sas respustas a sas domandas fatas prus de frecuente (FAQ) publicadas in su situ de sa Regione Autònoma de Sardigna.

Domandas frecuentes

A.F.

AVISU PÙBLICU

'Mesuras istraordinàrias e urgentes in agiudu de sas famìlias pro parare fronte a a s'emergèntzia econòmicu-sotziale nàschida dae sa pandemia de SARS-CO V2'

Si faghet ischire a totu sos interessados ca est istadu publicadu s'avisu e si podet presentare domanda pro pòdere benefitziare de sos cuntributos de sa Lege Regionale n.12 de su 8 de abrile 2020 'Mesuras istraordinàrias e urgentes in agiudu de sas famìlias pro parare fronte a a s'emergèntzia econòmicu-sotziale nàschida dae sa pandemia de SARS-CO V2'

1. Chie podet presentare domanda
Podent presentare domanda sos nùcleos familiares chi su 23 de freàrgiu de su 2020 resurtant residentes e domitziliados in su Comune:

a) sos cumponentes depent èssere (nessi in una de custas cunditziones):


• traballadores dipendentes o autònomos chi si sunt firmados cun su traballu o ant bistu minimare su traballu issoro pro neghe de s'emergèntzia epidemiològica dae Covid-19 e si sos meres de traballu issoro no ant tentu atzessu a sas formas de integratzione salariale o dd'ant tentu a pustis de su decretu de lege de su 17 de martzu 2020, n. 18;

• traballadores titulares de unu raportu de collaboratzione coordinada e continuativa iscritos a sa gestione separada de categorias econòmicas chi ant dèpidu firmare s'atividade issoro o minimare su traballu pro neghe de s'emergèntzia epidemiològica dae Covid-19;

• titulares de partidas IVA, o sòtzios de sotziedade iscritos a sa gestione de s' asseguratzione generale obligatòria (AGO) de categorias econòmicas chi ant dèpidu firmare s'atividade issoro o minimare su traballu pro neghe de s'emergèntzia epidemiològica dae Covid-19;

• collaboradores de impresas familiares de categorias econòmicas chi ant dèpidu firmare s'atividade issoro o minimare su traballu pro neghe de s'emergèntzia epidemiològica dae Covid-19;

• traballadores abarrados sentza rèdditu de traballu o de impresa dae su 23 de freàrgiu 2020.

b) sas persones chi tenent unu rèdditu chi no arribat a 800,00 èuros netos a su mese, cunsiderende su tempus chi andat dae su 23 de freàrgiu de su 2020 a su 23 de abrile de su 2020.


Inoghe s'avisu cumpletu e su mòdulu de nde iscarrigare pro fàghere sa domanda.

A.F.

EMERGÈNTZIA CORONAVIRUS:

S'ISPORTELLU LINGUÌSTICU SIGHIT A TRABALLARE

Si avisat chi, pro more de s'emergèntzia pro sa Covid-19, sas fainas de s'isportellu linguìsticu, fintzas a su 3 de su mese de maju, e francu perlongamentos chi ant a istabilèssere sas autoridades, ant a sighire cun su teletraballu. Sos operadores de isportellu sunt comente si siat a disponimentu pro cale si siat bisòngiu de tradutziones, fainas de interpretariadu, consulèntzias grammaticales e ortogràficas, consulèntzias didàticas, inditos bibliogràficos, sitogràficos,etc.

Sos operadores si podent chircare telefonende ònnia die, intra de sas 8 de mangianu e sas 8 de merie, a su nùmeru 349.6025986 o mandende unu messàgiu a s'indiritzu de posta eletrònica isportellu.limba.barigadu@gmail.com

A.F.

Assegnu de maternidade - Annu 2020

Ite est
Est un assegnu chi sas mamas chi NON traballant podent domandare a su Comune de residèntzia cando ddis naschet unu fìgiu, ddu adotant o ddu leant in afidu pre-adotivu in antis de sos 6 annos (o fintzas a sos 18 annos in casu de afidu o adotzione internatzionale). Podet presentare domanda chie tenet s'ISEE chi non superat sos 17.416,66 èuros. Sa domanda cheret fata intro de sos 6 meses dae cando naschet su pitzinnu, o dae cando arribat in famìllia in casu de adotzione o de afidu (sas domandas presentadas a pustis de sos 6 meses no ant a èssere leadas in contu).


Ite documentos tocat a Presentare
-sa tzertificatzione ISEE in cursu de valididade;
-sa fotocòpia de unu documentu de identidade in cursu de valididade;
-sa domanda in forma de autotzertificatzione chi atestat de èssere in règula cun sos recuisidos.


A chie ispetat
-a sas tzitadinas italianas;
-a sas tzitadinas de sa comunidade europea residentes in Itàlia;
-a sas extra-comunitàrias in possessu de unu permissu de sogiorno pro unu tempus mannu e chi siant residentes in su territòriu nostru.


Ite ispetat Un assegnu de 1740,60 èuros (diat a èssere 348,12 èuros pro 5 meses).
S'assegnu ddu dat s'INPS (faghende unu bonìficu o un assegnu intestadu a sa persone chi nd'at fatu rechesta) a pustis chi su comune at fatu totu sas verìficas e aprontadu sos atos netzessàrios pro su pagamentu.

Su mòdulu pro presentare sa domanda si nde podet iscarrigare dae su situ internet de su Comune www.comune.ulatirso.or.it
Pro àteras informatziones tocat a cuntatare su servìtziu sotziale comunale a custu nùmeru 0783/61000

A.F.

Cuntributos comunales pro sustènnere sas nàschidas:

Benebènnidu/a tra nois

Dae su 1° de ghennàrgiu 2020 a su 31 de nadale 2020 sas famìlias chi ant tentu unu fìgiu podent fàghere domanda a su Comune de Ula pro tènnere su cuntributu pro sustènnere sas nàschidas. Custu cuntributu econòmicu cheret èssere una manera pro parare fronte, nessi in parte, a sas ispesas chi sas famìlias devent afrontare a pustis de sa nàschida de unu fìgiu e premiare sa genitorialidade. Est una tantum de 1000 èuros pro ònnia fìgiu nàschidu in su 2020.

A chie ispetat:

  • a unu genitore (mama o babbu naturale) tzitadinu italianu, comunitàriu o extra comunitàriu, residente in su comune de Ula nessi dae 6 meses e solu si su fìgiu est residente dae cando est nàschidu in su comune de Ula;
  • a unu genitore chi adotat sentza afidamentu, residente in su comune de Ula nessi dae ses meses, solu si su pitzinnu non tenet prus de 6 annos;
  • in casu de separatzione giuditziale-consensuale o si sos genitores non sunt prus cunviventes depet tènnere sos recuisidos su genitore afidatàriu;
  • si su fìgiu nche est istadu istesiadu dae su nùcleu familiare de orìgine, su cuntributu chi diat a dèpere ispetare a unu de sos genitores (si tenet sos recuisidos) si dat a su tutore nominadu cun decretu de su Giùditze Tutelare.

Dae su situ web istitutzionale: www.comune.ulatirso.or.it si nde podet iscarrigare su mòdulu de domanda.

Pro informatziones si podet cuntatare su Servìtziu Sotziale de su Comune de Ula a custu nùmeru Tel. 0783 61000

A.F.

Emergèntzia Coronavirus (COVID - 19) - DPCM de su 10 de abrile 2020

Su Presidente de su Cussìgiu de sos Ministros, Giuseppe Conte, su 10 de abrile de su 2020 at firmadu su DPCM nou chi pròrogat fintzas a su 3 de maju 2020 sas mesuras restritivas pro cuntènnere s'emergèntzia epidemiològica dae Covid-19. Pro cantu atenet a sas atividades cummertziales, in custu decretu nou ddu at carchi piticu cambiamentu. Su Presidente Conte fàghere a ischire ca a cumintzare dae su 14 de abrile, a bellu a bellu, atividades meda cumintzant a torrare a abèrrere. Sa lista de sas atividades chi podent torrare a abèrrere contat una deghina de còditzes ATECO in prus, semper respetende sas mesuras de seguresa e garantende sa distàntzia sotziale mìnima comente recumandant sas normas in vigore. Intro de custas atividades ddoe sunt: sas cartolerias, sas librerias, sas butegas chi bendent bestimenta pro pitzinnos de naschidòrgiu e pitzinneddos, sunt istadas inseridas intro de sas atividades produtivas cunsentidas fintzas sa silvicoltura e sas indùstrias chi traballant sa linna. Sas dispositziones de su decretu tenent efetu dae su 14 de abrile fintzas a su 3 de maju. In su decretu est ispetzificadu ca s'ant a sighire a respetare sas mesuras de cuntenimentu prus restritivas chi ònnia Regione at adotadu, de acordu cun su Ministru de sa Salude, in àreas ispetzìficas de su territòriu regionale.

Chie cheret lèghere su testu cumpletu de su DPCM ddu podet agatare inoghe:

DPCM de su 10 de abrile 2020

A.F.

REIS: torrados a abèrrere sos tèrmines pro fàghere sa domanda

Su Responsàbile de su servìtziu sòtziu assistentziale assotziadu de s'Unione de sos comunes de Barigadu faghet a ischire a totu sos interessados ca, cunforme a sa Lege Regionale n.18 de su 2 de austu 2016 e a sa pròpia determinatzione n.114 de su 6 de abrile 2020, sunt istados torrados a abèrrere sos tèrmines pro presentare sas domandas pro su Programma Regionale 'Rèdditu de inclusione sotziale - Fundu regionale pro su rèdditu de inclusione sotziale 'Agiudu Torrau' REIS Annos 2019/2020.

Sa domanda cheret presentada a s'ufìtziu comunale de sos servìtzios sotziales intro de su 31 de maju a sa una.

A.F.

Avisu pùblicu pro sa cuntzessione de bonos de ispesa alimentare

Su responsàbile de su servìtziu sotziale assotziadu

in esecutzione de sa Deliberatzione de su Cussìgiu de Amministratzione de s'Unione de Barigadu n. 14 de su 03 de abrile 2020 e de sa pròpia determinatzione n. 113 de su 03 de abrile 2020

fàghere a ischire ca

si podet presentare domanda a su Comune de residèntzia pro tènnere unu ''bonu de ispesa'' comente at dispostu s'ordinàntzia de su Capu de su Dipartimentu de sa Protetzione Tzivile n. 658 de su 30 de martzu 2020, chi permitit de dare unu bonu pro comporare benes de prima netzessidade e bòmbolas de su gas.

Sos bonos de ispesa si dant in deretura a unu referente de su nùcleu familiare chi nche ddos podet ispèndere in sas butegas iscritas in un elencu chi ònnia comune de s'unione de sos comunes de Barigadu s'incurat de aprontare e de publicare in su situ istitutzionale suo.

Su bonu de ispesa est de cunsiderare una tantum chi ispetat in custu tempus de emergèntzia.

Totu sos interessados podent cuntatare in su telèfono o in sa posta eletrònica, su Comune issoro de residèntzia, pro domandare su bonu de ispesa. Ònnia persone chi nde faghet rechesta at a èssere torradu a cuntatare dae su servìtziu sotziale comunale chi, bista s'autotzertificatzione/dichiaratzione de sa situatzione familiare presentatada, chi onniunu at a dèvere compilare, at a dare sos bonos de ispesa in paperi chi nch'ant a èssere leados in deretura a domo de sos chi nd'at fatu rechesta dae sa guàrdia munitzipale, un operàiu comunale, voluntàrios o dae sa cumpangia de sos barratzellos. Su bonu de ispesa si nche podet ispèndere in sos esertzìtzios cummertziales cunventzionados ebbia.

Custos sunt su nùmeru de telèfono e s'indiritzu de sa posta eletrònica de cuntatare:

Ula Tirso
078361000
sociale@comune.ulatirso.or.it


Pro totu sas informatziones si podet intrare a su situ istitutzionale de su comune de Ula, lèghere s'avisu pùblicu e bìere s'elencu de sas atividades cummertziales chi ant aderidu a custa initziativa. In su situ de su comune si nde podet iscarrigare fintzas su mòdulu de domanda prontu de cumpilare.

A.F.

Mesuras istraordinàrias urgentes pro cuntrastare e prevènnere sa difusione epidemiològica dae COVID-19

AVISU
Mèrcuris, su 8 de abrile sanificatzione locales comunales e arredos urbanos

Si faghet a ischire a totu sos tzitadinos ca comente at dispostu s'artìculu n.6 de s'ordinàntzia n.11 de su 24 de martzu 2020 de su Presidente de sa Regione Autònoma de Sardigna

IN DIE DE MÈRCURIS SU 8 DE ABRILE 2020

Su comune de Ula Tirso s'at a incurare de disinfetare custos logos pùblicos e custos arredos urbanos:

  • su munitzìpiu e sos tretos a canta (pratza Itàlia);
  • sa farmatzia, s'ambulatòriu e sos tretos a canta (via Cagliari);
  • sa biblioteca, su tzentru de agregatzione sotziale e sos tretos a canta (via Tirso e pratza IV Novembre);
  • sa pratza in dae nantis de sa crèsia manna de Sant Andria.

Pro cunsentire chi su traballu de sanificatzione programmadu si potzant fàghere a sa mègius manera si faghet a ischire ca:

1. Non si podet lassare sa vetura in giassos chi siant a canta de custos logos chi amus numenadu; (in particulare in su tretu de sas pensilinas pro aspetare su postale chi sunt a canta dae sa domo comunale, de s'ambulatòriu e de crèsia manna nen in sos giassos de su tzentru de agregatzione sotziale.

2. Sos ufìtzios comunales abarrant serrados totu sa die.

3. S'ambulatòriu comunale abarrat serradu totu sa die manna, in casu de apretu si podet telefonare a su nùmeru de sa dotoressa Medde

4. Sa farmatzia abarrat serrada totu su mangianu ma aperit a su sero.

Si torramus gràtzias pro s'agiudu!

A.F.

In s'ordinàntzia nùmeru 11 de su 24 de martzu 2020 de su Presidente de sa Regione Sarda àteras restritziones e dispositziones noas chi tocat a sighire pro cuntrastare su COVID-19

Avisu a sos tzitadinos: comente depet fàghere sa regorta de s'àliga chi est in cuarantena o isulamentu in domo.

S' Istitutu Superiore de sa Sanidade, su 14 de martzu 2020, at dadu totu sas racumandàntzias pro comente depent seberare s'àliga sos chi sunt in cuarantena, in isulamentu fidutziàriu in domo o chi sunt resurtados positivos a su tampone.

Comente seberare e che fuliare s'àliga de domo si ses positivu o in cuarantena obligatòria

  • Non depes seberare prus s'àliga de domo tua.
  • Pone duos o tres sachitos (a intro de pare) in s'istèrgiu de s' indiferentziada, mengius chi siat un istèrgiu a pedale.
  • S'àliga (plàstica, imbìrdiu, paperi, ùmidu e indiferentziada) nche cheret posta totu in su matessi istèrgiu de s'indiferentziada.
  • Sos mucadoreddos o sos ròtulos de paperi, sas mascarinas, sos guantos, sos telos chi si portant una borta ebbia nche cherent fuliados totus a s'indiferentziada.
  • Pone·di sos guantos pro serrare sos sachitos, non ddos depes ischitzare cun sas manos ma acapiare cun su nastru adesivu o su ligatzu issoro.
  • A pustis de àere serradu sos sachitos fùlia·nche sos guantos in sas bustas noas chi as aprontadu, (ammenta·di semper de nde pònnere duos o tres a intro de pare). A pustis samuna·di bene sas manos.
  • S'àliga nche cheret bogada ònnia die comente faghes pro s'indiferentziada.
  • Sos animales de cumpangia non depent intrare a in ue tenes sos sacos de s'àliga.

si NON ses essidu positivu a su tampone e NON ses in cuarantena

  • Sighi a seberare s'àliga comente as fatu fintzas a como.
  • Si ses remadiadu porta mucadoreddos de paperi e beta·nche·ddos a s'indiferentziada.
  • Si t'as postu mascarina e guantos, a pustis fulia.nche.ddos a s'indiferentziada.
  • Pro s'indiferentziada pone duos o tres sachitos fortes a intro de pare in s'istèrgiu chi pones semper.
  • Serra bene su sachitu.
  • Boga·nche s'àliga comente faghes pro s'indiferentziada.

A incuru de su Grupu ISS 'Comunicazione Nuovo Coronavirus'
Fonte ISS de su 13 de martzu de su 2020

A.F.

Provedimentos de su Decretu Legislativu n.18 de su 17 de martzu 2020 chi pròrogat unas cantas iscadèntzias

Publicadu in sa Gazeta Ufitziale n.70 de su 2020 su Decretu Legislativu n.18 de su 17 de martzu 2020 numenadu Decretu Cura Itàlia 'mesuras pro potentziare su Servìtziu Sanitàriu Natzionale e agiudu econòmicu pro sas famìlias, sos traballadores e sas impresas in tempus de emergèntzia epidemiòlogica dae COVID-19'. Una manovra de su Guvernu chi ponet a dispositzione pro sas impresas e sas famìlias 25 millardos de èuros. In su decretu sunt presentes totu sas mesuras pro afortigare su Sistema Sanitàriu Natzionale, sustènnere su traballu e àteras mesuras fiscales in agiudu de sas famìlias e de sas impresas. Intro de sos àteros provedimentos ant prorogadu unas cantas iscadèntzias pro su versamentu de tributos e cuntributos. In su situ de su Comune de Ula agatades publicada una 'tabella riepilogativa' chi podet èssere de agiudu pro s'ammentare dies e iscadèntzias noas.

A.F.

Emergèntzia Sanitària CORONAVIRUS

Avisu de su sìndigu a sos tzitadinos

In cunformidade cun cantu ant dispostu sos DPCM de su 8 e de su 9 de martzu 2020, cun s'iscopu de amparare sa salude pùblica, finas a su 3 de abrile, francu pròrogas, si podet lòmpere a sos ufìtzios comunales pro pràticas netzessàrias e urgentes ebbia, solu a pustis de àere leadu un apuntamentu telefonende a su n. 0783 61000.

Pro èssere semper informados e agiornados de s'emergèntzia sanitària coronavirus intrade a inoghe

A.F.

Sa 'remada' de su cumponidori

Bella meda, ocannu, s'editzione de sa Sartiglia: tantos sos isteddos corpidos; isteddu de oro pro Ignazio Lombardi (cumponidori de su sòtziu de sos massajos chi at corpidu s'isteddu cun ispada e cun istocu); tripleta pro sa parìllia de Cristian Matzutzi (cumponidori de su sòtziu de sos mastros de linna); 'remada' apassionante de Lombardi chi at lassadu sa gente a buca aberta.
Custa de sa 'remada' est una traditzione antiga e màgica.
Comente totus ischint, su cumponidori est su 're' de sa Sartiglia sos Grèmios nòminant s'issoro in die de Nostra Signora de Candelas, su 2 de freàrgiu, dende.li sa candela beneita. Bestidu chi siat cun sa pannimenta antiga, su cumponidori setzet a caddu e non podet prus tocare terra finas a finire sa cursa.
Sa parte prus bella, prova manna de abilidade, est sa 'remada': su cumponidori curret corcadu a ischina in segus, beneighende sa gente cun sa 'pipia de maju' (unu fuste de cumandu fatu de violas).
Su mistèriu de su significadu de sa paràula 'remada' no est istadu ancora isortu e nois puru, a pustis lèghida carchi etimologia in sos social network, cherimus provare a nàrrere sa nostra. Tenende contu de sa pronùntzia (ca sa gente narat 's'arremada', non 'sa remada'), nos paret chi sa paràula si potzat cullegare a su verbu 'arrimare'.
Custa est sa definitzione chi dat Pedru Casu in su vocabulàriu suo pro su verbu 'arrimare': 'arrimare tr. appoggiare. rifl. Arrimaresi appoggiarsi, addossarsi. Anche al fig. Arrimaresi a una familia cercar rifugio, appoggio presso una famiglia. Fermarsi'.
Duncas forsis 'arremada' benit pròpiu dae su movimentu chi faghet su cumponidori 'arrimende' ('appoggiando') s'ischina a su caddu, chi est su momentu chi decretat sa fine de sa cursa.

(GFP)

Cuncursu pro istrutore amministrativu - Provas orales

Si dat a ischire chi sas provas orales de su cuncursu pro 1 postu de istrutore amministrativu de categoria C 1 a tempus indeterminadu s'ant a fàghere lunis 3 de freàrgiu 2020 a sas 10 de mangianu in sa domo comunale.

(GFP)

Presentatzione libru ''Carlo Felice e i tiranni sabaudi'' de Frantziscu Casula

Su Comune de Ula, sa biblioteca comunale e s'ufìtziu limba sarda bos invitant a partetzipare a sa presentatzione de su libru ''Carlo Felice e i tiranni sabaudi'' de Frantziscu Casula (Edizioni Grafica del Parteolla, Dolianova, 2016, € 16,00).

Su cunvegnu s'at a fàghere in Ula sàbadu 15 de làmpadas a sas 6 de sero (h 18,00) in su Tzentru de Agregatzione sotziale de pratza IV Novembre.

Su libru documentat sa polìtica de sos Savòias siat comente sovranos de su Rennu de Sardigna (1726-1861) siat comente res de Itàlia (1861-1946). Contat sos sèberos tristos de custos sovranos in contu de economia, de polìtica, de cultura e sas modalidades de guvernu chi ant ispogiadu sa Sardigna tratende sos Sardos comente òmines culturalmente inferiores.

Coòrdinat sos traballos su sìndigu Ovidio Loi e presentat su libru su professore Zusepe Melis. Sos concruos los at a fàghere s'autore Frantziscu Casula.

Seis totus invitados a partetzipare.

(GFP)

Sa paristòria de Mandronedda

Pro sos prus piticos, publicamus sas ischedas de sa paristòria de Mandronedda. Sunt 12 ischedas chi faeddant de una pudda chi non cheriat criare: pro la fàghere intrare a criare sa mere at proadu a pònnere in mesu àteros personàgios chi l'ant semper torradu su nono, finas a cando su gatu... (su restu de su contu l'agatades in sas ischedas, chi podides iscarrigare e colorare a praghere bostru).

Totu sas ischedas si podent iscarrigare dae sa pàgina intitulada 'Sa paristòria de Mandronedda'.

(GFP)

Interventu ''La famiglia cresce'' pro agiuare sas famìllias mannas

Sa responsàbile de su Servìtziu Sotziale dat a ischire chi sa Regione Sardigna at destinadu 3.720.000 èuros pro agiudare sas famìllias mannas, chi tenent bator o prus fìgios in domo.

Sunt destinatàrios de s'interventu sos nùcleos familiares residentes in Ula chi a sa data de iscadèntzia de s'avisu tenent in càrrigu bator o prus fìgios intre sos 25 annos e chi tenent unu rèdditu ISEE chi non sobrat sos 30.000 èuros. Custas famìllias ant a retzire 160 èuros pro onni fìgiu a càrrigu.

Sas domandas cherent presentadas intro sa una (h 13,00) de su 24 de maju 2019.

Chie est interessadu devet presentare domanda a s'Ufìtziu Protocollo de su Comune (su mòdulu si podet iscarrigare dae su situ www.comune.comune.ulatirso.or.it o ritirare in s'Ufìtziu de sos Servìtzios Sotziales). In prus, tocat a presentare sos documentos chi sighint:

- atestatzione ISEE vàlida;

- còpia de documentu de identidade vàlidu;

- verbales o tzertificados sanitàrios (si b'at invalididade o handicap de carchi fìgiu).

Su Comune at a verificare sos tìtulos e at a mandare sa graduatòria a su PLUS, chi at a fàghere una graduatòria ùnica de sos chi tenent deretu, ordinada a tenore de s'ISEE. Si bi càpitat paridade, s'ant a valutare sos tìtulos chi sighint: 1) nùmeru de fìgios in sas primas 100 dies de vida; 2) nùmeru de fìgios cun disabilidade; 3) nùmeru totale de fìgios in càrrigu intre sos 25 annos.

Pro cale si siat crarimentu si podet preguntare in s'Ufìtziu de sos Servìtzios Sotziales.

Iscàrriga s'avisu

(GFP)

Progetu Home Care Premium 2019 - Assistèntzia domitziliare

Si dat a ischire chi in su situ de s'INPS est publicadu su bandu pùblicu Home Care Premium 2019 pro dipendentes e pensionados pùblicos e pro sos parentes issoro chi non sunt autònomos, chi permitit de curare sos malàidos in domo.

CHIE NDE TENET DIRITU

Mannos e minores chi non sunt autònomos e chi possedint sa tzertificatzione prevista dae su bandu, est a nàrrere:

- dipendentes e pensionados iscritos a sa gestione unitària de sas prestatziones creditìtzias e sotziales; pensionados utentes de sa gestione dipendentes pùblicos e còniuges issoro (si non b'at sentèntzia de separatzione);

- parentes e afines de primu gradu, mancari non siant cunviventes; còniuges chi ant fatu unione tzivile; cunviventes ex lege 76/2016; frades o sorres de su titulare (si est tutore o curadore);

- minores òrfanos de utentes o de pensionados de sa gestione dipendentes pùblicos; minores afidados a su titulare de su diritu.

COMENTE SI PRESENTAT SA DOMANDA

Sa domanda cheret presentada in manera telemàtica intrende in su situ Inps (si podet pedire agiudu a su Contact Center de s'Inps o de sos Patronados).

PRO FÀGHERE SA DOMANDA TOCAT A

- èssere iscritos a su programma ''Accesso al servizio di welfare'' (si chie nde tenet profetu no est su titulare);

- tènnere su PIN dispositivu de s'Inps;

- tènnere sa Decraratzione Sostitutiva Ùnica (DSU) pro determinare s'ISEE.

ITE SI PODET OTÈNNERE

1) cuntributu econòmicu a tenore de su bisòngiu pro tènnere assistèntzia familiare;

2) prestatziones integrativas (servìtzios de professionistas, possibilidade de comporare ausìlios pro disàbiles, percursos de integratzione iscolàstica, atividades isportivas, cunsigna de màndigu domo pro domo etc.)

Sa domanda cheret presentada intro de mesudie (h 12,00) de su 30 de abrile 2019.

Pro informatziones e agiudu si podet pedire a sas assistentes sotziales in s'isportellu de informatzione (Comune de Ilartzi, carrera Matteotti 64 tel. 0785 561031; Unione Comunes Bosa, carrera Azuni ex Pro Loco).

(GFP)

Agiornamentu Pranu triennale pro prevènnere sa corrutzione (annos 2019-2021)

Su Comune de Ula devet aprovare intro de su 31 de ghennàrgiu 2019 su ''Pranu Triennale de Preventzione de sa Corrutzione'' (P.T.P.C.) pro sos annos 2019-2021, chi at a tratare finas de sos òbligos de trasparèntzia.

Comente previdet su Pranu Natzionale Anti-Corrutzione, su Comune dat sa possibilidade a tzitadinos e organizatziones de mandare propostas e osservatziones pro megiorare su Pranu.

Sas propostas si podent mandare a su Responsàbile de sa Preventzione de sa Corrutzione (Segretàriu comunale dot. Pietro Caria) a manu o mandende una mail a s'indiritzu comune.ulatirso@legalmail.it intro de su 22 de ghennàrgiu 2019.

De sas osservatziones anònimas non si nd'at a fàghere contu.

Iscàrriga su mòdulu

(GFP)

Presèpiu vivente

Su Comune de Ula paris cun sa parròchia de Santu Andria Apòstolu e cun s'iscola tzìvica de mùsica organizant unu presèpiu itinerante pro giòbia 27 de nadale 2018.

Sa manifestatzione at a comintzare a sas 5 (h 17,00) e at a èssere acumpangiada dae sos sonadores de launeddas. A pustis s'at a fàghere su cuntzertu de Nadale in sa crèsia parrochiale.

Seis totus invitados a partetzipare!

(GFP)

Locandinas pro sa biblioteca

Progetu ''Promemòria Auschwitz Sardegna 2019''

S'assòtziu ''ARCI Sardegna'' bandit su progetu ''Promemòria Auschwitz Sardegna 2019'' pro giòvanos dae sos 18 a sos 25 annos.

Su progetu est promòvidu dae s'Unione de sos Comunes de Barigadu e gestidu dae s'assòtziu ''ARCI Sardegna'' paris cun s'assòtziu ''Deina''. B'ant aderidu sos Comunes de Ardaule, Bidoniu, Busache, Fordongianus, Neoneli, Sorradile e Ula e tenet s'iscopu de educare sos giòvanos a èssere tzitadinos europeos e a cumprèndere sos collegamentos e sas cumplessidades de su mundu in ue bivent.

Su momentu prus importante est su biàgiu a Cracòvia, chi previdit de visitare su Museu-Fàbrica de Oscar Schindler, su ''ghetto'' ebreu de Cracòvia e sos campos de cuntzentramentu de Auschwitz-Birkenau.

Sos giòvanos interessados a partetzipare devent compilare sa domanda (online ebbia) intro de sàbadu 15 de nadale 2018. Tocat a èssere residentes in sas biddas chi ant aderidu a su progetu e bi cheret unu contributu de ispesa de 80 èuros.

Ant a èssere ammìtidos a partetzipare 2 giòvanos dae onni bidda (foras de Busache, Fordongianus e Neoneli chi nd'ant a ammìtere 3).

Totu sas informatziones si podent agatare in su situ de su Comune de Ula.

Sa domanda de iscritzione si podet compilare online incarchende inoghe.

(GFP)

Festa de Santu Andria - Avisu de su Comitadu

Su Comitadu de sa festa invitat a totu sos chi cherent abèrrere sas cantinas pro sa festa de Santu Andria a partetzipare a sa riunione chi s'at a fàghere giòbia 22 de santandria in su salone parrochiale.

Pro fàghere s'iscrutadore

Chie cheret fàghere s'iscrutadore de sègiu eletorale e tenet sos recuisidos de lege podet presentare domanda intro de su mese de santandria.

Pro fàghere sa domanda (chi cheret presentada a s'incarrigada sig.ra Maria Fois) tocat a èssere residentes in su Comune e àere fatu s'iscola de s'òbligu. Non si pagat nudda.

Categorias chi non si podent iscrìere:

- sos dipendentes de sos Ministèrios de s'Internu, de sas Postas e de sos Trasportos;

- chie apartenet a Fortzas armadas in servìtziu;

- mèigos cundutos, dotores provintziales e ufitziales sanitàrios;

- dipendentes e segretàrios de sos Comunes in ue si faghet sa votatzione;

- candidados a cussa votatzione.

Chie est giai iscritu in s'albo, si podet fàghere cantzellare si b'at motivu grave.

Pro nd'ischire de prus: http://www.comune.ulatirso.or.it/index.php/servizi/procedimenti/p/0/15.

(GFP)

Asseguratzione agevolada contra a sas maladias de su bestiàmene e pro sas istruturas aziendales - Annu 2018

Si dat a ischire a sos imprendidores agrìculos chi finas a su 31 de nadale 2018 b'at tempus pro fàghere s'asseguratzione agevolada contra a sas maladias de su bestiàmene e pro sas istruturas aziendales.

Pro more de unu contributu pùblicu custas asseguratziones benint a costare prus pagu. Pro lu pòdere otènnere tocat a

- Èssere imprendidores agrìculos cun partida IVA iscritos a sa Càmera de Cummèrtziu;

- Andare a su Tzentru de Assistèntzia Agrìcula a agiornare (o fàghere dae nou) su fascìculu aziendale o su registru de istalla;

- Preparare su PAI/Manifestatzione de interessu pro sos produtos de assegurare;

- Firmare su tzertificadu de asseguratzione pro sas produtziones o allevamentos chi si cherent assegurare (tocat a b'allegare sa manifestatzione de interessu e/o su PAI);

- Fàghere preparare dae su Tzentru de Assistèntzia Agrìcula sa domanda de pagamentu.

Pro sa matessi coltivatzione (o allevamentu) si podet fàghere un'asseguratzione ebbia.

Pro nd'ischire de prus si podet preguntare in sos ufìtzios de su Cunsòrtziu de difesa de sas produtziones intensivas de sa provìntzia de Aristanis in sa zona industriale (Istrada C3) o telefonare a sos nùmeros 0783-354216 o 349-6582238.

Sas istruturas si podent assegurare dae gràndine, trumbas de ària, nie, bentu forte, uraganu, lampos, abba meda, ghilighia.

Pro nd'ischire de prus e pro ischire dae cales maladias si podet assegurare su bestiàmene bos podides collegare a su situ de su Comune de Ula.

(GFP)

Sas règulas noas pro s'iscritzione a s'Anàgrafe

Dae su 9 de maju 2012 b'at règulas noas pro su càmbiu de residèntzia, a tenore de s'art. 5 D.L. 5/2012, cunvèrtidu in lege 35/2012.

Pro pedire su càmbiu de residèntzia como si podent impreare ebbia sos mòdulos chi sunt in su situ de su Ministeru de s'Internu o in su situ istitutzionale de su Comune de Ula e tocat a los presentare cun una de custas modalidades:

- in s'ufìtziu anàgrafe de su Comune de Ula

- cun racumandada in sa Posta

- cun fax.

Sa decraratzione cheret acumpangiada SEMPER dae su documentu de identidade de chie faghet sa domanda e de sos chi càmbiant sa residèntzia paris cun issu.

Sos documentos si podent mandare finas in via telemàtica cun una de sas modalidades chi sighint:

a) decraratzione firmada cun firma digitale;

b) identificatzione de s'autore cun carta de identidade eletrònica o carta natzionale de sos servìtzios;

c) trasmissione cun posta eletrònica tzertificada de chie faghet sa domanda;

d) iscansione de sa decraratzione (firmada) e de su documentu de identidade e imbiu cun posta eletrònica ordinària.

Totu sos documentos si podent iscarrigare dae su situ de su Comune de Ula (http://www.comune.ulatirso.or.it/ente/albo/840).

(GFP)

Pranu regionale de protetzione tzivile

Sa Regione Sardigna at postu a disponimentu de totus in su situ Sardegna ParteciPA s'ischema de Pranu Regionale de Protetzione Tzivile adotadu dae sa Giunta regionale (ex L.R. 13/2018). S'intentu est de fàghere preventzione pro chi non si tèngiant dannos cando b'at calamidades.

Sas zonas de vigilàntzia meteorològica sunt publicadas in su situ de sa Protetzione Tzivile, dae in ue si podet iscarrigare finas su vademecum pro ischire comente si cumportare si b'at undamentu.

S'Ufìtziu Limba Sarda de Ula aiat aprontadu una sìntesi de custas normas pro las dare a sa gente de Ula in ocasione de sa simulatzione de emergèntzia fata su 21 de abrile 2018. Chie cheret podet iscarrigare su Pdf postu in allegadu.

(GFP)

torna all'inizio del contenuto
torna all'inizio del contenuto