Vai a sottomenu e altri contenuti

Die de sa Sardigna 2019 – Su presidente Solinas faeddat in sardu in Cussìgiu regionale

Su 28 de abrile 2019, in ocasione de sa Die de sa Sardigna, su presidente de sa Regione Christian Solinas in sa riunione solenne de su Cussìgiu regionale at fatu su discursu suo totu in sardu, sutalineende s'importàntzia de impreare sa limba istòricu-identitària nostra in sa vida de onni die. De l'impreare in totue no in domo ebbia (''agli arresti domiciliari'') ma finas in iscola, in sos ufìtzios, in su traballu, ca sa limba est su signale prus importante de s'identidade de unu pòpulu.

''Custu mangianu - at ammentadu su guvernadore - amus pregadu e intesu missa in limba sarda. Custu, a nois polìticos, nos balet de ammonimentu ca, si faghet a cunsagrare sa limba in sa liturgia, faghet finas a la ''cunsagrare'' in iscola e in totu sas istitutziones de s'Ìsula''.

''Sa Die - at sighidu Solinas - nos ammentat unu fatu istòricu importante e nos preguntat chie semus, ite cherimus e a in ue cherimus imbàtere. B'at unu collegamentu forte intre identidade e economia: pensamus ebbia a sos produtos sardos prus connotos in su mercadu mundiale, chi sunt sos produtos identitàrios''.

Comente operadores impignados in sa promotzione de sa limba sarda non podimus no èssere cuntentos de custu passu fatu dae sa màssima istitutzione sarda. Auguramus chi siat su primu de milli passos a cara a su bilinguismu.

Ascurta s'interventu

(GFP)

Link di riferimento

http://www.lanuovasardegna.it/regione/2019/04/28/news/sa-die-de-sa-sardigna-solinas-e-la-festa-del-popolo-sardo-1.17808184

torna all'inizio del contenuto
torna all'inizio del contenuto