Vai a sottomenu e altri contenuti

Avisos e àutos in limba sarda de su Comune de Neoneli

RAS: Ordinàntzia N. 31 de su 4 de trìulas 2020

Àteras mesuras istraordinàrias urgentes pro s'amparu dae sa difusione de s'epidemia de COVID-19 in su territòriu regionale de Sardigna. Ordinàntzia cunforma a s'artìculu 32, comma 3, de sa lege 23 nadale 1978, n. 833 in matèria de igiene e sanidade pùblica. Professiones religiosas e manifestatziones traditzionales.

In su situ istitutzionale de su Comune de Neoneli, in su giassu de s'avisu in limba italiana, si podet iscarrigare s'Ordinàntzia N. 31 de su 4 de trìulas 2020.

(MM)

RAS: Ordinàntzia N. 30 de su 4 de trìulas 2020.

Àteras mesuras istraordinàrias urgentes pro s'amparu dae sa difusione de s'epidemia de COVID -19 in su territòriu regionale de Sardigna. Ordinàntzia cunforma a s'artìculu 32, comma 3, de sa lege 23 nadale 1978, n. 833 in matèria de igiene e sanidade pùblica. Atividade isportiva e motòria.

In su situ istitutzionale de su Comune de Neoneli, in su giassu de s'avisu in limba italiana, si podet iscarrigare s'Ordinàntzia N. 30 de su 4 de trìulas 2020.

(MM)

ESTIAMO IN BARIGADU

S'Unione de sos Comunes de su Barigadu organizat in sos meses de trìulas e austu 2020 sas atividades de animatzione isportiva pro sos minores, residentes in sos Comunes de s'Unione, chi in s'annu iscolàsticu 2019/2020 ant frecuentadu sas iscolas de s'infàntzia, primària e segundària de primu gradu (3/13 annos).

Sos atividades s'ant a fàghere ebbia in su Comune de residèntzia de sos minores.

Si pedit a sas famìllias de respetare s'iscadèntzia de su 24 de làmpadas previdida pro sas preiscritziones.

Sas domandas chi ant a arribare a pustis de sas 13.00 de sa data de iscadèntzia no ant a èssere atzetadas.

In su situ istitutzionale de su Comune de Neoneli, allegadu a sa nova in limba italiana, si podet iscarrigare su mòdulu de domanda.

Est postu in contu de fàghere custos isport: mountain bike, freesay skate board, monopàtinu, parkour e àteros.

Paris cun sa domanda si depet mandare sa retzida de su versamentu de sa cuota de € 30,00 pagada pro ogni minore. Si de sa matessi famìllia partètzipant duos minores, sa cuota est de € 50,00.

(MM)

PRESCRITZIONES CONTRA DE SOS FOGOS - ANNU 2020

Cun s'Ordinàntzia de su Sìndigu, sa n. 2 de su 17-06-2020, su Comune de Neoneli

- Cunsideradu ca sos terrinos non coltivados e abbuscados, essende prenos de fenu e erba mala, podent èssere unu perìgulu pro sa salude, ca bi bivent e creschent bobbois noghiles, e pro sos fogos;

- Cunsideradu ca in meda istradas comunales non si podet passare ca sas molas non sunt istadas pudadas e sos cambos ant istrintu su logu in ue passare;

- Bidu su Còdighe Nou de s'Istrada e su regulamentu suo, sos disponimentos de su Decretu Legislativu 18 austu 2000 - N. 267, sa Lege 21/11/2000 - N. 353, sa L.R. n. 8 de su 27/04/2016, sa Delìbera de sa Giunta Regionale n. 22/3 de su 23/04/2020 e s'Allegadu suo;

òrdinat

1) A sos meres de sos terrinos lìberos a intro de sa bidda o a làcana, de ddos pulire, de bogare sas molas de ruu e s'erba mala, de messare su fenu, a intro de su 30 de làmpadas 2020, pro non tènnere su perìgulu de sos fogos o chi bi abarret àliga;

2) A sos meres de sos terrinos a làcana de sas istradas abertas pro passare sa gente a manera lìbera, fintzas sas chi sunt a intro de sa bidda, de pudare - a intro de su 30 de làmpadas 2020 - sas molas a manera chi abarrent a intro de sas propiedades issoro e chi in s'istrada si potzat passare pro totu sa largària sua;

3) A sos meres e a sos chi tenent in afitu aziendas agrìculas a làcana de istradas pùblicas, fintzas cussas comunales e sas chi sunt acanta, a intro de su 30 de làmpadas 2020, de

- Pulire dae s'erba e su ruu sos tretos acanta de s'istrada e de sas retzintziones;

- De fàghere sas doas a inghìriu de sos fràigos e de sos cungiados;

4) A sos Entes propietàrios o gestores de istradas e pertinèntzias istradales de segare e leare, a intro de su 30 de làmpadas 2020, su fenu, sos cambos e su ruu segados in sa viabilidade de cumpetèntzia pròpia.

Cunsideradu ca dae su 1u de làmpadas a su 31 de santugaine b'est su perìgulu mannu meda de fogu in su sartu o in terrinos chi non sunt pulidos, sos traballos de pulire giardinos, ortos, terrinos non coltivados e àteros giassos sìmiles a intro de bidda e a intro de 100 metros dae sa bidda si depent fàghere a intro de su 30 de làmpadas 2020.

A chie non respetat s'Ordinàntzia e sas Prescritziones Regionales contra de sos fogos at a èssere aplicada una santzione amministrativa in dinare chi podet èssere dae € 25,00 a € 500,00.

Totu sos sugetos prepostos (Barratzellos, Carabineris, Guàrdias comunales e àteros) sunt autorizados a controllare chi s'ordinàntzia siat respetadas.

(MM)

Cun su libru de Eliano Cau, Se l'inverno declina, torrat Licanias

S'editzione 2020 de Licanias si depiat fàghere sa prima chida de làmpadas ma pro s'emergèntzia Covid 19, comente in totue, no at fatu. Su festival, chi non si firmat etotu, s'at a fàghere in su mese de austu, cun atòbios e ospites de non pèrdere e ponende in contu sos inditos pro s'amparare dae s'epidemia COVID 19 .

Pro torrare a incomintzare, s'atòbiu est in Neoneli, giòbia 18 de làmpadas, in pratza Itàlia a sas 06.00 de sero, Eliano Cau at a resonare de su libru suo Se l'inverno declina, editziones Condaghes, cun Antonello Cau.

In su respetu de sas mesuras anti Covid, est de òbligu sa mascheredda pro totu sos chi ant a partetzipare.

Su romanzu contat de Eros chi, essende malàidu a su coro, in su 1971 andat a Torinu pro si fàghere operare. In Sardigna lassat s'isposa, Linda - chi ddi cheret bene e dd'ispetat - ma in Piemonte issu bivet cun pistighìngios e timorias, sa passione pro s'istùdiu e sentimentos de amore pro àteras fèmmina chi at a connòschere. In su perìodu de s'interventu connoschet Giselle e Malisa; in s'ispidale ddi abarrant acanta sa mama e una mòngia, suor Lia. E tra penas e turmentos sighit semper s'idea de diventare iscritore.

S'autore Eliano Cau est iscritore de romanzos e novellas, poeta in limba sarda e in limba italiana , giùighe in cuncursos de poesia, professore de lìteras. In su 2000 at iscritu deghe contos pro sa domo imprentadora S'Alvure de Aristanis e in su 2001, semper cun S'Alvure at publicadu su primu romanzu suo Dove vanno le nuvole. At sighidu cun àteros romanzos: Adelasia del Sinis, in su 2004, e Per le vie mute , in su 2008; a pustis Son luce e ombre, Luce degli addii e fintzas In ojos de amore, poesias in sardu e in italianu.

(MM)

IMU 2020

S'informant sos tzitadinos ca su 16 de làmpadas 2020 est sa data de s'iscadèntzia pro su versamentu de s'acontu IMU 2020

Cun sa lege de bilantzu 2020 est istada cantzellada sa TASI chi est istada unida a sa ''IMU noa''.

Sa matessi Lege de bilantzu at cunfirmadu sas règulas pro su pagamentu de s'imposta in duas ratas: 16 de làmpadas pro s'acontu e 16 de nadale pro su saldu.

Sos decretos publicados dae martzu pro fàghere fronte a sa pandemia non ant prorogadu sas iscadèntzias francu pro su setore turìsticu, chi at tentu abolidu su pagamentu de sa prima rata de acontu chi iscadit su 16 de làmpadas.

Cunsideradu ca su Comune de Neoneli no at ancora deliberadu sas alìcuotas pro s'annu 2020, sa prima rata est paris a sa metade de su chi si est istadu pagadu a tìtulu de IMU pro s'annu 2019.

Su saldu de su 16 de nadale at a èssere pagadu a segunda de sas alìcuotas chi ant a èssere aprovadas a intro de su 28 de santugaine 2020.

Novidade pro SOS RESIDENTES IN S'ÈSTERU: Dae su 2020, cun sa Lege de bilàntziu 2020, Art. 1, commas 738/787 - Lege 27 nadale 2019, n. 160, non est prus previdida sa possibilidade de cunsiderare un'immòbile comente abitatzione printzipale. Duncas, sos AIRE depent pagare s'imposta pro totu sos immòbiles chi si tenent in Itàlia, sentza etzetzione.

Su versamentu si depet fàghere cun su modellu F24; su còditze de su comune de Neoneli est F867; totu sos còditzes tributu sunt in s'allegadu de sa nova publicada in su situ istitutzionale de su Comune de Neoneli in ue s'agatant fintzas àteras informatziones.

Su versamentu mìnimu cumplessivu annuale chi ogni sugetu passivu depet pagare est de € 12,00.

(MM)

ORDINÀNTZIA N. 27 DE SU 02 DE LÀMPADAS 2020

In su situ istitutzionale de su Comune de Neoneli est istada publicada s'ordinàntzia de su Presidente de sa Regione Sardigna, sa n. 27 de su 02 de làmpadas 2020, in contu de àteras mesuras istraordinàrias urgentes pro cumbatere e fàghere sa preventzione a sa difusione epidemiològica dae COVID-19 in su territòriu regionale de sa Sardigna. S'Ordinàntzia est cunforma a s'art.32, comma 3, de sa lege 23 de nadale 1978, n.833 in matèria de igiene e sanidade pùblica.

(MM)

Ordinàntzia n. 23 de su 17 de maju 2020

In su situ istitutzionale de su Comune de Neoneli est publicada s'ordinàntzia n. 23 de su 17 de maju 2020 cunforma a s'art. 32, comma 3, de sa lege 23 de Nadale 1978, n. 833, in matèria de igiene e sanidade pùblica, chi pertocat àteras mesuras istraordinàrias urgentes de cuntrastu e preventzione de sa difusione epidemiològica dae COVID-19 in su territòriu regionale de sa Sardigna.

(MM)

Inditos de importu pro sa piaga de sa violèntzias a sas fèminas

S'Istitutu Superiore de Sanidade informat comente podent tènnere agiudu sas fèminas chi sunt vìtimas de violèntzia, in custu tempus chi semus ancora in emergèntzia pro su coronavirus nou.

Sas fèminas chi sunt vìtimas de violèntzia non sunt obligadas a abarrare in domo, podent essire e pedire agiudu a sos Carabineris, Politzia o àteros.

O podent

Telefonare a su nùmeru gratùitu 1522 in ue, ogni die - die e note, respondet personale espertu.

Impreare s'App 1522 pro smartphone. S'App si podet iscarrigare cun sos sistemas prus connotos de IOS e Android.

Impreare s'App YouPol pro trasmìtere in su momentu messàgios a sos operadores de sa Politzia de s'Istadu. Si podet telefonare in deretura dae s'App a su nùmeru ùnicu de emergèntzia 112; si custu no est ativu respondet sa sala operativa 113 de sa Cuestura.

Si podent leare cuntatos cun unu Tzentru contra a sa violèntzia; sunt abertos comente in antis de s'emergèntzia COVID-19.

Si abisòngiant curas mèdicas, tocat a andare a su Prontu Sucursu. Sos operadores sòtziu-sanitàrios de su Prontu Sucursu ant a ischire curare e agiudare pro cumintzare a nde essire dae sa violèntzia.

Chie at tentu violèntzia sessuale podet telefonare a su nùmeru birde AIDS e IST 800 861061. Personale espertu respondet dae su lunis a sa chenàbura, dae sas 13,00 a sas 18,00. Est utilosu fintzas su situ www.uniticontrolaids.it

Sentza duda peruna e sentza trantzire, telefonare a su 112:

· Si b'est istada un'agressione fìsica o sa minetza de agressione fìsica

· Si b'est istada una violèntzia psicològica

· Si sa detzisione est de fuire cun sos fìgios (est custa sa manera de evitare sa denùntzia pro nch'àere leadu sos minore)

· Si chi est maltratende tenet armas

(MM)

ORDINÀNTZIA N. 23 DE SU 17 DE MAJU 2020

In su situ istitutzionale de su Comune de Neoneli est istas publicada s'Ordinàntzia n. 23 cunforma a s'art.32, comma 3, de sa lege 23 de nadale 1978, n.833 in matèria de igiene e sanidade pùblica.. su documentu pertocat àteras mesuras istraordinàrias urgentes de gherra e preventzione a sa difusione epidemiologica dae COVID-19 in su territòriu regionale de sa Sardigna

(MM)

BURSA DE ISTÙDIU NATZIONALE A FAVORE DE SOS ISTUDIANTES DE SAS ISCOLAS SEGUNDÀRIAS DE SEGUNDU GRADU - D. LGS. 13/04/2017 N. 63 - ANNU ISCOLÀSTICU. 2019/2020

Su Comune de Neoneli at publicadu s'avisu pro sas bursas natzionales de istùdiu a favore de sos istudiantes de sas iscolas segundàrias de segundu gradu; in su situ istitutzionale de su Comune si agatant s'Avisu, su Mòdulu de sa domanda e s'Informativa privacy


COMUNE DE NEONELI

Provìntzia de Aristanis

BURSA DE ISTÙDIU NATZIONALE A FAVORE DE SOS ISTUDIANTES DE SAS ISCOLAS SEGUNDÀRIAS DE SEGUNDU GRADU - D. LGS. 13/04/2017 N. 63

ANNU ISCOLÀSTICU. 2019/2020

A V I S U

S'INFORMAT SA TZITADINÀNTZIA CA SI PODET PRESENTARE SA DOMANDA PRO OTÈNNERE SA BURSA DE ISTÙDIU NATZIONALE PRO SOS ISTUDIANTES DE SAS ISCOLAS SEGUNDÀRIAS DE SEGUNDU GRADU, ISTATALES E PARITÀRIAS, PRO S'ANNU ISCOLÀSTICU 2019/2020.

PRO OTÈNNERE SA BURSA DE ISTÙDIU EST NETZESSÀRIU:

1. Èssere iscritos pro s'annu iscolàsticu 2019/2020 in un'iscola segundària de segundu gradu de su sistema natzionale de istrutzione (iscolas istatales e paritàrias).

2. S'Indicadore de sa Situatzione Econòmica Ecuivalente (I.S.E.E.) de sa famìllia de apartenèntzia depet èssere a intro de sos 14.650,00 èuros.

3. Compilare su mòdulu - domanda e allegare custa documentatzione:

 fotocòpia de s'atestatzione de s'ISEE in cursu de valididade emìtida cunforma a sa normativa previdida dae su DPCM n.159/2013;

 fotocòpia de su documentu de identidade, chi siat vàlidu, de su rechedente.

4. Presentare sa domanda a su Comune de residèntzia (Ufìtziu Servìtziu Sotziale), a intro de su 15 de LÀMPADAS 2020. Sa domanda dda podet presentare su genitore, su rapresentante legale de s'istudiante o s'istudiante etotu si est magiorenne.

5. Sa domanda si podet presentare fintzas cun sa posta eletrònica tzertificada e/o ordinària (sèbera su Comune) a custu indiritzu: info @comune.neoneli.or.it.

Su Comune at a trasmìtere s'elencu de sos istudiantes chi si podent ammìtere a sa Regione Sardigna, chi at a aprontare una graduatòria ùnica regionale, aprontada in òrdine de ISEE dae su prus bassu a su prus artu, connoschende, in casu de paridade de ISEE, sa pretzedèntzia a s'istudiante prus giòvanu de edade. S'elencu de sos istudiantes postos a manera ùtile in sa graduatòria, sos benefitziàrios de sa bursa, at a èssere trasmìtidu a su Ministeru de s'Istrutzione. S'erogatzione de sas bursas in favore de sos istudiantes benefitziàrios s'at a fàghere cun bonìficu domitziliadu in sa manera chi at a èssere istabilida dae su Ministeru de s'Istrutzione. S'importo de ogni bursa de istùdiu est istabilidu in 200 èuros.

INFORMATIVA PRIVACY

S'informativa est aprontada dae su Ministeru de s'Istrutzione e est publicada in su situ de su Comune e in su situ de su Ministeru: https://iostudio.pubblica.istruzione.it/web/guest/voucher

MODULÌSTICA E INFORMATZIONES

Sa modulìstica de impreare est a disponimentu in su situ de sa Regione Sardegna: www.regione.sardegna.it, in su situ de su Comune e in s'Ufìtziu Amministrativu servìtzios iscolàsticos.

Pro informatziones:

COMUNE

Ufìtziu Amministrativu: responsàbile Bianca Maria Corda

Dies e oràriu de abertura: dae su lunis e a sa chenàbura

Telèfono: 0783/67747

Posta eletrònica: info @comune.neoneli.or.it.

MINISTERU DE S'ISTRUTZIONE situ web https://iostudio.pubblica.istruzione.it/web/guest/voucher

Posta eletrònica: iostudio@istruzione.it

Neoneli, su 07/05/2020 SU SÌNDIGU

SALVATORE CAU

(MM)

NEONELI - ''CONTOS IN SU TELÈFONO''

Su Comune de Neoneli, a pustis de àere regaladu tablet e ricàricas pro sa connessione a Internet a sos istudiantes de totu sas iscolas, faghet un'àtera initziativa indiritzada a sos giovaneddos e a sas famìlias issoro. S'Amministratzione, ghiada dae su sìndigu Salvatore Cau, paris cun sa cumpangia Bocheteatro de Nùgoro, mandat a in antis unu progetu de leturas in su telèfono pro sos pitzinnos e pro sas famìlias issoro.

Su tìtulu est ''L'Officina della fantastica. Favole al telèfono'' e est s'adatamentu de un'ispetàculu-giogu chi depiat mòvere in Nùgoro pro sos chentu annos de sa nàschida de Gianni Rodari. Essende serrados teatros e bibliotecas pro neghe de su coronavirus, su progetu andat peri sos cavos de su telèfono.

Protagonista est Monica Corimbi, atora e responsàbile de su setore pitzinnos de sa cumpangia Bocheteatro, chi at tentu s'idea e chi est impignada in una letura interativa originale de pàginas leadas dae su repertòriu de s'iscritore mortu baranta annos a como, su 14 de abrile 1980.

Giai operativu in Nùgoro, su progetu imbatet como a Neoneli in mesu de sas initziativas chi aprontant s'editzione noa de Licanias, festival literàriu promòvidu dae s'Amministratzione comunale de Neoneli, chi si diat dèpere fàghere dae su 4 a su 6 de làmpadas, si sa situatzione dd'at a permìtere.

''In unu tempus particulare comente su chi semus bivende'', ponet in evidèntzia su sìndigu Salvatore Cau, ''cherimus creare carchi momentu de cunfortu pro sos pitzinnos e pro sas famìlias issoro, cun unu progetu de letura collegadu a su festival Licanias. A su matessi tempus damus un'oportunidade de traballu a un'istitutzione teatrale, sa cumpangia Bocheteatro, presìdiu culturale de importàntzia manna pro sa sotziedade''.

Ogni letura durat dae sos 15 a sos 20 minutos e est indiritzada a pitzinnos de ogni edade. Pro si prenotare, sos genitores podent telefonare su Comune de Neoneli a su nùmeru 0783.67747, in oràriu de ufìtziu.

(GFP/MM)

NEONELI - COMPUTER A SOS ISTUDIANTES

Sighint sas atziones de agiudu a sos istudiantes fatas dae sos carabineris, chi sunt cunsignende a sos pitzocos tablet e computer pro chi potzant sighire sas letziones in tele-didàtica.

Sos militares de Neoneli ant dadu sos agiudos didàticos a noe famìlias chi no nde teniant.

Su cumandante de s'Istatzione de sa bidda, Riccardo Saracini, at retzidu in cunsigna dae su sìndigu Salvatore Cau 9 tablet, chi sunt istados dados a 9 istudiantes de s'iscola primària. Sos istrumentos telemàticos ddos at postos a disponimentu s'Amministratzione comunale, pro chi sos giòvanos potzant sighire sas letziones online. Pro sa cunsigna de carchi tablet fiat presente finas su sìndigu Cau.

(GFP/MM)

Mesuras istraordinàrias e urgentes a sustegnu de sas famìlias pro fàghere fronte a s'emergèntzia Covid-19

Mesuras istraordinàrias e urgentes a sustegnu de sas famìlias pro fàghere fronte a s'emergèntzia econòmicu - sotziale causada dae sa pandemia SARS-CO V2

In su situ istitutzionale de su Comune de Neoneli, in sa nova in limba italiana si podet iscarrigare su mòdulu pro sa domanda.

UNIONE DE SOS COMUNES DE SU BARIGADU

Ardaule - Bidoniu - Busache - Fordongianus - Neoneli - Nughedu Santa Itòria - Samugheo - Sorradile - Ula

Localidade Giolantine - (09082) Busache (Aristanis) - Tel. 0783.60123 - Fax 0783.60323

Còditze Fiscale e Partida I.V.A. 01116420959

situ web: www.unionecomunibarigadu.it - posta eletrònica: info@unionecomunibarigadu

COMUNE DE NEONELI

AVISU PÙBLICU

'Mesuras istraordinàrias e urgentes de agiudu a sas famìlias pro fàghere fronte a s'emergèntzia econòmicu - sotziale causada dae sa pandemia SARS-CO V2'

1. Rechisidos de ammissione

Podent fàghere domanda sas famìlias residentes e domitziliadas in su Comune a sa data de su 23.02.2020:

a) chi sos chi nde faghent parte siant (a su nessi una cunditzione):

- traballadores dipendentes o autònomos chi apant tentu s'atividade de traballu firmada, suspèndida, o reduida pro more de s'emergèntzia epidemiològica de Covid-19 e chi sos meres de su traballu no apant usufruidu de sas formas de integratzione salariale o bi siant passados pro more de su decretu lege 17 de martzu 2020, n. 18;

- traballadores titulares de raportos de collaboratzione coordinada e continuativa iscritos a sa gestione separada de categorias econòmicas chi ant tentu s'atividade firmada, suspèndida, o reduida pro more de s'emergèntzia epidemiològica de Covid-19;

- titulares de partidas IVA, o sòtzios de sotziedades iscritos a sa gestione de s'asseguratzione generale obligatòria (AGO) de categorias econòmicas chi ant tentu s'atividade firmada, suspèndida, o reduida pro more s'emergèntzia epidemiològica de Covid-19;

- collaboradores de impresas familiares de categorias econòmicas chi ant tentu s'atividade firmada, suspèndida, o reduida pro more de s'emergèntzia epidemiològica de Covid-19;

- chie non teniat rèdditu de traballu o de impresa a sa data de su 23 de freàrgiu 2020.

b) cun rèdditu inferiore a € 800,00 a su mese pulidos in su perìodu 23.2.2020/23.4.2020.

2. Càusas de esclusione

Non benefìtziant de s'indennidade sas famìlias fintzas a tres persones e chi a su nessi unu de sos chi nde faghet parte tiret una pensione o unu rèdditu de traballu dipendente o de atividade de traballu chi no est istada suspèndida o no est istada riduida pro càusa acapiadas a s'emergèntzia epidemiològica de Covid-19, chi s'importu siat uguale o superiore a èuros 800,00, a sa data de sa presentatzione de sa domanda.

3. Critèrios de cuntzessione de sas indennidades

Sas indennidades ant a èssere erogadas in s'òrdine cronològicu de sa presentatzione de sas domandas.

S'anàlisi at a èssere fata pro sos nùcleos familiares e non pro sos indivìduos, leende in cunsideru sas informatziones giai connotas dae sos ufìtzios comunales e de s'autotzertificatzione indicada in s'artìculu 6 de custu avisu.

Su Comune protzedit a manera cuntestuale a s'anàlisi de s'abbisòngiu chi at a èssere fata dae sos ufìtzios comunales, fintzas in acordu e collaboratzione cun s'ente gestore de sos servìtzios sòtziu-assistentziales (PLUS) o àteros entes.

4. Indennidades chi ispetant

S'indennidade si podet acumulare cun àteras formas de sustegnu a su rèdditu, fintzas collegadu a s'emergèntzia epidemiològica de Covid-19, fintzas a 800 èuros a su mese pro sas famìlias fintzas a tres persones. Pro ogni àtera persone in prus sunt cuntzèdidos 100 èuros.

5. Modalidades de erogatzione e fruitzione de sas providèntzias

Sas providèntzias ant a èssere erogadas:

˗ tèssera CNS;

˗ cartas prepagadas;

˗ bonìficu bancàriu;

˗ àteras formas permìtidas dae sa lege.

6. Comente presentare sa domanda pro tènnere sas providèntzias

Sa domanda pro otènnere sas indennidades est in forma de AUTOTZERTIFICATZIONE, chi est fintzas s'atestatzione de sa beridade de sas decraratziones fatas.

S'autotzertificatzione si depet presentare impreende su modellu apòsitu allegadu, paris cun su documentu de identidade de su chi faghet sa rechesta, e si podet trasmìtere cun sa posta eletrònica a s'indiritzu sociale@comune.neoneli.or.it o cunsignada a manos, si ddu sèbera su richiedente, a su Comune de Neoneli - Ufìtziu Servìtziu Sotziale.

7. Controllos

Su Comune at a fàghere sos controllos dèpidos, fintzas a campione, pro controllare sa beridade de sas decraratziones sostitutivas fatas pro otènnere sas providèntzias, fintzas pedende de produire atestatziones pretzisas, agigu chi sas diretivas natzionales ant a permìtere de torrare a sas atividades normales.

S'ammentat ca, a norma de sos artt. 75 e 76 de su D.P.R. 28/12/2000, n. 445 e sas modificatziones e integratziones fatas a pustis, chie faghet decraratziones farsas est punidu cunforme a su còditze penale e de sas leges ispetziales in matèria e, pro sa decraratzione non bera, perdet sos benefìtzios chi, in casu, podiat otènnere dae su provedimentu emìtidu aende presentadu una decraratzione non bera.

8. Responsàbile de su Protzedimentu

Su Responsàbile de su Protzedimentu est s'Assistente Sotziale Marinella Casula.

9. Publitzidade

Custu avisu at a èssere publicadu paris a su modellu de domanda, in sa home page de su situ istitutzionale de su Comune de Neoneli e in cussa de su situ istitutzionale de s'Unione de sos Comunes de su Barigadu.

10. Informativa pro su tratamentu de sos datos personales REG. UE N. 679/2016

S'Unione de sos Comunes de su Barigadu, comente titulare de su tratamentu, at a impreare sos datos personales cunferidos cun modalidade prus che totu informàticas e telemàticas, pro s'esecutzione de sos còmpitos pròpios de interesse pùblicu o semper e cando collegados a s'esertzìtziu de sos poteres pùblicos pròpios; sunt inclùdidas sas finalidades de archiviatzione, de chirca istòrica e de anàlisi pro iscopos istatìsticos. Sos datos ant a èssere tratados pro totu su tempus chi at a serbire pro sa congruida de su protzedimentu-protzessu o pro s'esecutzione de su servìtziu-atividade pedida e, a pustis pro sa congruida de su protzedimentu-protzessu o sessamentu de su servìtziu-atividade. Sos datos ant a èssere costoidos a manera cunforme a sas normas in contu de sa remunidura de sa documentatzione amministrativa.

Sos datos ant a èssere tratados a manera esclusiva dae su personale e dae sos collaboradores de su titulare e s'ant a pòdere comunicare a sugetos designados a manera apòsita comente responsàbiles de su tratamentu.

Foras de custas ipòtesis sos datos no ant a èssere comunicados a àtere o difùndidos, si no cando est prevididu a manera ispetzìfica dae su diritu natzionale o dae s'Unione europea.

Sos interessados tenent su diritu de pedire a su titulare de su tratamentu de pòdere atzèdere a sos datos personales e a sa retìfica o a cantzellare sos datos o a sa limitatzione de sos tratamentos chi ddis pertocat o de si opònnere pro su tratamentu (artt. 15 e sos chi sighint de su RGPD).

Sos interessados, si bi sunt sas cunditziones , tenent, fintzas, su diritu de propònnere reclamu a s'Autoridade de controllu (Garante Privacy) sighende sas protzeduras prevididas.

Su Responsàbile de su Servìtziu sotziale Assotziadu

f.du Ass. Sotziale Maria Mascia

(MM)

Emergèntzia COVIS-19: s'isportellu de sa limba sarda sighit a traballare

Sotziedade Cooperativa L'altra cultura

Si avisat chi, pro more de s'emergèntzia pro sa Covid-19, sas fainas de s'isportellu linguìsticu, fintzas a su 3 de su mese de maju e francu perlongamentos chi ant a istabilèssere sas autoridades, ant a sighire cun su teletraballu.

Sos operadores de isportellu sunt comente si siat a disponimentu pro cale si siat bisòngiu de tradutziones, fainas de interpretariadu, consulèntzias grammaticales e ortogràficas, consulèntzias didàticas, inditos bibliogràficos, sitogràficos, etc.

Sos operadores si podent chircare telefonende ònnia die, intra de sas 8 de mangianu e sas 8 de merie, a su nùmeru 349.6025986 o mandende unu messàgiu a s'indiritzu de posta eletrònica isportellu.limba.barigadu@gmail.com

Documenti allegati

Documenti allegati
Titolo  Formato Peso
Avisu Formato pdf 71 kb
Rassigna_fotografia Formato pdf 82 kb
Tasi Formato pdf 208 kb
Vacàntzia_in_badde_de_Aosta. Formato pdf 170 kb
Vìsita_chentina_Mamuiada Formato pdf 211 kb
Situ_internet_istòria_e_territòriu Formato pdf 163 kb
Ordinàntzia Formato pdf 71 kb
Deliberatzione Formato pdf 222 kb
Modellu_bendidores Formato pdf 104 kb
Cummèdia Formato pdf 337 kb
Dimanda Formato pdf 76 kb
Avisu Formato pdf 185 kb
Mustra fotogràfica Formato pdf 112 kb
Avisu Formato pdf 191 kb
torna all'inizio del contenuto
torna all'inizio del contenuto