- MESURAS DE PREVENTZIONE DE SA DIFUSIONE DE SU VIRUS COVID-19

Contzitadinos istimados,

sa situatzione chi semus bivende no est de sas mègius, eris a sero su Presidente Conte at firmadu su DPCM illarghende sa zona ruja a totu su territòriu natzionale, e at comunicadu a s'Itàlia intrea sa netzessidade de abarrare unidos e de collaborare, totus paris, pro bìnchere custa batalla contra de su COVID-19.

Ognunu de nois, cun responsabilidade e sensu tzìvicu mannu, depet fàghere sa parte sua.

Est in sas dificultades, in su momentu de su bisòngiu chi nd'essit a pìgiu s'unione, su sentidu bonu e s'ispìritu de pensare a sos àteros de una comunidade, e s'istòria s'imparat ca bortas meda dae sas situatziones prus complicadas sunt incomintzados sos atos mannos de crèschida e de isvilupu!

Paris cun custa comunicatzione bos trasmito:

· unu promemoria cun pagas règulas de rispetare, sèmplitzes, ma a su matessi tempus de fundamentu pro renèssere a bìnchere su coronavirus;

· su DPCM 09/03/2020;

· s'ordinàntzia n. 5 de su 09/03/2020 de su Presidente de sa Regione Sardigna;

· còpia de su modellu de autotzertificatzione pro si mòvere a foras de su Comune nostru (ebbia pro traballu, salude o netzessidade chi si podet provare);

· avisu de sa serrada a su pùblicu de sos ufìtzios comunales.

Pro cale si siat netzessidade o informatzione podides tzirriare a sos ufìtzios comunales a su nùmeru 0783 67747 o, cunsideradu su pagu personale a disponimentu in custu perìodu, in deretura a su sutascritu a su nùmeru 333 5765304.

Cun s'isperu chi su prus in presse sa vida torret a èssere comente fiat, m'est agradèssidu de bos mandare sos saludos meos.

Su Sìndigu

F.du Salvatore Cau

Allegados in sa comunicatzione in limba italiana:

Mòdulu autodEclaratzione pro si mòvere dae su territòriu de su comune

Ordinàntzia RAS n.5.2020

DPCM de su 09.03.2020

(MM)