Vai a sottomenu e altri contenuti

Coronavirus: sos inditos pro sos tzitadinos

Pro cantu atenet a s'infetzione de coronavirus, faghimus presente a totu sos tzitadinos ca tocat a sighire sas mesuras de preventzione chi nos at dadu su Ministeru de sa Salude.
Si tenimus dudas o sìntomos suspetos, non tocat a andare a su dotore, né a s'ispidale, né in pronto socorso o in sos ambulatòrios, ma tocat a abarrare in domo e a telefonare a su dotore de famìlia o, pro sos pitzinnos, a su pediatra chi est istadu seberadu. Si podet finas tzirriare a su nùmeru birde 800 31 13 77, operativu in totu su territòriu regionale e ativu onni die dae sas 8 de mangianu a sas 8 de sero. A intro de note, in casu de apretu, si podet tzirriare a su nùmeru de utilidade pùblica 1500 e a su 118.

Su Presidente de su Cussìgiu, Giusepe Conte, at firmadu su DPCM de su 9 de martzu 2020 cun sas mesuras novas pro cuntènnere e cumbàtere sa difusione de su virus Covid-19 in totu su territòriu natzionale.
Su provedimentu àplicat sas mesuras de s'art. 1 de su DPCM de su 8 de martzu 2020 a totu su territòriu natzionale. Non si podet atopare gente in sos logos pùblicos o abertos a su pùblicu. Est cambiadu finas s'art. 1, lìtera d de su DPCM de su 8 de martzu 2020 chi dat inditos pro sos eventos e sas manifestatziones isportivas.

Custas dispositziones intrant in vigore dae su 10 de martzu 2020 e ant a bàlere finas a su 3 de abrile 2020. In cunformidade cun sos DPCM, numenados in antis, tocat a evitare sos movimentos de gente chi intrat e chi essit dae sos territòrios numenados in s'artìculu, e finas a intro de su matessi territòriu, francu chi no siat un'essida fata pro lòmpere a su logu de traballu o pro netzessidade est a nàrrere ca si podet essire pro motivos de salude. Si podet torrare a sa pròpia domo, domitzìliu o residèntzia.
Sos tzitadinos podent sighire a essire pro traballu ebbia, salude o bisòngiu, compilende e mustrende su mòdulu aprontadu in ue autotzertificant sa cunditzione issoro.
Sas autoridades ant a verificare si su chi su tzitadinu at dichiaradu est beridade o nono. Si non si respetant sas normas si faghet unu reatu comente narat s'artìculu 650 de su còditze penale (pro no àere osservadu unu provedimentu de s'autoridade), francu chi sa cosa fata non potzat èssere finas peus e duncas cussiderada «ipòtesi de reatu prus grave».


Serrant sas atividades cummertziales chi non bendent benes de prima netzessidade - àteras mesuras pro cuntènnere e gestire s'emergèntzia epidemiològica dae su COVID-19 in totu su territòriu natzionale.
Dae su 12 de martzu 2020 e finas a su 25 de martzu 2020 a pustis de s'essida de su DPCM de su 11 de martzu 2020, ant a serrare totu sas atividades cummertziales francu cussas chi bendent benes de prima netzessidade e sas farmatzias (in s'allegadu 1 de su DPCM numenadu in antis agatades totu s'elencu).


Ite depet fàghere chie arribat dae zonas a rìschiu
Dae su 8 de martzu 2020 chie arribat dae sas zonas a rìschiu numenadas in s'ordinàntzia de su Presidente de sa Regione Sardigna n.4 de su 8 de martzu 2020 devet:
-nàrrere custa cosa a su dotore suo, a su pediatra chi at seberadu, o a s'ufitziale sanitàriu cumpetente;
-abarrare acorradu in domo, isuladu pro 14 dies
- non si podet essire dae domo né viagiare, tocat a èssere in logu fàtzile de agatare in casu ddu apat netzessidade de ddue lòmpere o pro faghet unu controllu

Si tenides sìntomos tocat a avisare immediatu a su dotore o a su pediatra chi ais seberadu o a s'ufitziale sanitàriu cumpetente;
In sos portos e aeroportos sardos sos chi sunt arribende dae sas zonas iscritas in s'ordinàntzia depent nàrrere a su personale de sos controllos, incarrigadu dae sa Regione Sardigna, s'indiritzu de su logu in ue ant a abarrare in isulamentu fidutziàriu pro 14 dies e tocat chi ddis lassent finas unu nùmeru de telèfono.

S'autodenùntzia pro chi devet respetare sa barantena obligatòria si nche devet mandare a:
-su dotore de meditzina generale
-su pediatra seberadu
-su servìtziu de Igiene e Sanidade pùblica
-s'indiritzu de posta eletrònica de s'ATS info.viaggicovid19@atssardegna.it
S'òbligu de abarrare isulados in su pròpiu domitzìliu e de ddu denuntziare a sas autoridades sanitàrias in manera chi si potzant agatare in cale si siat momentu est retroativu de 14 dies. Sunt duncas obligados a ddu fàghere finas totu cussos chi sunt lòmpidos in Sardigna in antis chi esseret essida s'ordinàntzia de su 8 de martzu 2020.

Pro àteras informatziones e pro èssere semper agiornados podides intrare a inoghe:

Ministeru de sa Salude

Coronavirus Regione Sardigna

A.F.

torna all'inizio del contenuto
torna all'inizio del contenuto