Vai a sottomenu e altri contenuti

Sas Bibliotecas de Barigadu in Radio Cuore

Custa dies passadas in Ischire, trasmissione in sardu de Radio Cuore, Antoni Ignàtziu Garau at chistionadu cun Ivano Piras, dipendente de sa Cooperativa La Lettura de Aristanis chi tenet in gestione su Sistema Bibliotecàriu de Barigadu.
Ivano traballat in sas bibliotecas de Neoneli, Bidoniu e Sorradile e at contadu comente totu sas bibliotecas de Barigadu ant chircadu de parare fronte a s'emergèntzia e de s'ativare a manera noa pro sighire a garantire sos servìtzios a sos utentes issoro.

Su virus at mudadu meda sa vida nostra de ònnia die, cun dannos meda fintzas in su campu de sa cultura, comente ais traballadu boisàteros e comente ais torradu a 'imbentare' su traballu bostru?

Nois amus cumintzadu a traballare in domo -at naradu Ivano- e a pustis de pagu tempus, gràtzias a sa sensibilidade de sos sìndigos, de sos amministradores comunales e a s'agiudu mannu de voluntàrios meda, amus pòdidu garantire su servìtziu de prèstidu a domitzìliu faghende a manera chi sos utentes nostros non s'esserent intèndidos abbandonados … non podiant lòmpere issos a sa biblioteca? Issaras sa biblioteca est lòmpida a domo issoro! Sa tecnologia nos at dadu un'agiudu mannu, mancari tocat a nàrrere ca in carchi bidda de Barigadu sa connessione non est cosa cosa, semus ancora ispetende chi partat su progetu de sa banda larga comente nos aiant promìtidu. Amus ativadu su prèstidu a domitzìliu, unu servìtziu nou chi podiat pregontare chie si siat telefonende in deretura a sa biblioteca o iscriende una mail in ue lassaiat nadu ite libru aiat chèrfidu a nche ddi leare a domo. Amus dadu cussìgios de letura, informatziones e amus ativadu sa piataforma digitale MLOL (MediaLibraryOnline) dae in ue sos utentes podent iscarrigare in formadu digitale totu su materiale chi cherent: libros, audiolibros e rivistas dae totu su mundu e semus sighende a traballare pro rinnovare custu progetu.

Comente seis pentzende de sighire su traballu in sos meses de maju e làmpadas?

Semus aspetende de ischire ite ant a nàrrere in Regione. Podet èssere chi a segunda de sos inditos chi ant a essire amus a pòdere torrare a abèrrere respetende totu su protocollo de seguresa (distantziamentu sotziale e dispositivos de protetzione individuale).

A sos pitzinnos e a sos utentes ite messàgiu cherides dare?

Pro como, si puru amus a pòdere torrare a abèrrere, de seguru non amus a fàghere prus sas atividades de animatzione a sa letura e totu sos laboratòrios in presèntzia cun sos pitzinnos comente in antis. Amus a pònnere carchi cosa in sas retes sotziales aspetende sos tempos chi s'at a pòdere torrare a fàghere su traballu nostru paris a sos antzianos e a sos pitzinnos. Su cantu podimus chircamus de veiculare sa cultura cun totu sos trastos multimediales chi tenimus a dispositzione sighende a assegurare custu servìtziu culturale de importu mannu a totu sos utentes nostros in ònnia bidda de Barigadu.

Ascurta s'intervista (dae su de 11 minutos )

A.F.

torna all'inizio del contenuto
torna all'inizio del contenuto