Vai a sottomenu e altri contenuti

Su 5 de maju: die mundiale pro s’igiene de sas manos

Onni annu, a cumintzare dae su 2005, s'Organizatzione Mundiale de sa Sanidade promovet su 5 de maju sa die mundiale pro s'igiene de sas manos, pro fàghere a cumprèndere a totus, cantu una faina chi paret una cosa de pagu contu est de importu mannu pro sa preventzione de sas infetziones e prus puru in sos ambientes de ispidale. Ocannu su messàgiu chi s'OMS at seberadu est 'save lives: clean your hands', salva vidas:samuna·di sas manos. A si samunare bene sas manos cheret nàrrere a non s'apitzigare maladias pari pari, dae cussas prus frecuentes comente podet èssere un'influèntzia o unu remadiu a cussas prus perigulosas.
Sas manos curant, dant assistèntzia e cunfortu, sunt sa prima arma chi tenimus a dispositzione pro nos difèndere dae sas infetziones, a cumintzare dae cussa dae COVID-19. A portare sas manos netas est unu sinnale de amore e de respetu pro nois matessi e pro totu sos chi sunt a canta a nois. Custu est su chi cheret nàrrere su vìdeo intituladu 'le mani curano' aprontadu ocannu dae s'ISS (Istitutu Superiore de sa Sanidade) pròpiu in ocasione de sa die mundiale de s'igiene de sas manos. In su vìdeo sas manos sunt rapresentadas in medas maneras: apressant e dant assistèntzia. Non podiant mancare sos riferimentos a custa situatzione de epidemia dae COVID -19 chi semus bivende, faghent a bìere operadores sanitàrios e unu pòddighe chi ischitzat su butone pro tzirriare s'ascensore: custa est una de sas maneras de apitzigare sas maladias chi ant documentadu a su tempus de sa SARS. Regordamus a totus ca est cumintzada cussa chi su Guvernu at numenadu FASE 2 e como, comente e prus de in antis, devimus dare atentzione a mantènnere sa distàntzia tra pare e tocat a leare totu sas precautziones netzessàrias. Unu agiudu mannu est pròpiu a portare semper sas manos netas pro minimare sas infetziones e cuerrare sa salude nostra e de sos àteros!

Inoghe podes abbaidare su vìdeo e sos cartellos aprontados dae s'ISS pro nos ammentare de si samunare semper bene sas manos e nos mustrare comente fàghere.

Cando si samunare sas manos

Comente si samunare sas manos

A.F.

torna all'inizio del contenuto
torna all'inizio del contenuto