Vai a sottomenu e altri contenuti

COVID 19: SAS LÌNIAS GUIDA DE SA FASE 2

SAS MESURAS NOAS DE SU DECRETU LEGE DE SU 16 DE MAJU 2020 N.33 E DE SU DPCM DE SU 17 DE MAJU 2020

ITE CÀMBIAT DAE SU 18 DE MAJU

ATIVIDADES ECONÒMICAS E PRODUTIVAS: ITE CÀMBIAT CUN SU DPCM DE SU 17 DE MAJU
Dae su 18 de maju torrant a abèrrere sas atividades chi:
-bendent a sa minuda, sos tzentros cummertziales e sos mercados in foras
-atividades de servìtzios a sa persone (mastros de pilos e tzentros estèticos)
-servìtzios de ristoratzione (ristorantes, pub)
-istabilimentos in logu de mare

COMENTE DEVENT FÀGHERE
Tocat a intrare a pagu a pagu respetende sa distàntzia de seguresa de unu metru nessi tra pare respetende sos protocollos de seguresa e sas lìnias guida chi dat sas regiones o sa Cunferèntzia de sas Regiones, respetende sos printzìpios e sos protocollos de sas lìnias guida natzionales.

ATIVIDADES ECONÒMICAS E PRODUTIVAS: LÌNIAS DE INDIRITZU DE SAS REGIONES PRO SU CUMMÈRTZIU A SA MINUDA IN ÀREAS PÙBLICAS (MERCADOS, FIERAS E MERCADOS DE SOS HOBBISTAS)

MESURAS GENERALES

-Intradas mesuradas e controlladas

-Distàntzia de seguresa tra pare

-Intradas reguladas in base a cantu est mannu su locale

-Disponibilidade e atzessibilidade de sistemas pro disinfetare sas manos

-Portare guantos pro intrare a sas atividades a comporare

-Òbligu de mascareddas pro operadores e pro clientes

-Dare totu sas informatziones, cun cartellos in italianu e inglesu, pro mantènnere sa distàntzia de seguresa tra sos chi sunt in fila pro intrare

CUMPETÈNTZIAS DE SOS COMUNES

-Su Comune in logu de mercadu depet fàghere a mancu chi ddoe siat unu muntone de gente, fàghere respetare sa distàntzia de seguresa tra pare de unu metru nessi, fàghere tzirculare sa gente in base a su logu chi ddoe est a dispositzione

Pro garantire sa distàntzia de seguresa tra pare tocat:

-a aprontare corsias a sensu ùnicu

-pònnere signalètica ( verticale e orizontale) in s'oru de sas bancarellas

-sas bancarellas devent èssere a tesu s'una dae s'àtera e, su cantu si podet, diat a tocare a ismanniare s'àrea de su mercadu

-ònnia bendiolu devet tènnere un'àrea bastante a fàghere a manera chi sa gente non s'atrumet e chi siat garantida sa distàntzia de seguresa tra pare

-Sos comunes ant a detzìdere si sas cosas usadas s'ant a pòdere bèndere o nono

ATIVIDADES ECONÒMICAS, PRODUTIVAS E SOTZIALES

Mesuras de seguresa prevìdidas dae su d.l. n.33 de su 16 de maju e dae su dpcm de su 17 de maju

Sas atividades econòmicas, produtivas e sotziales devent torrare a cumintzare sighende sos protocollos e sas lìnias guida, idòneas a minimare su rìschiu de contàgiu in su setore de riferimentu, leadas dae sas Regiones o sa Cunferèntzia de sas Regiones respetende sos printzìpios de sos protocollos e de sas lìnias guida natzionales.

Si non si respetant sos protocollos o sas lìnias guida, regionales o natzionales, e non s'assegurat unu livellu bonu de seguresa, s'atividade podet èssere fata serrare fintzas a si pònnere in seguresa.

Sas regiones s'ant a incurare de controllare ònnia die comente est andende sa situatzione epidemiològica in sos territòrios de cumpetèntzia issoro e, s'in casu, podent detzìdere de leare àteras mesuras noas faghende dèrogas e restritziones.

ATIVIDADES ISPORTIVAS

Comente si mòvere intro de su DL n.33 e su DPCM de su 17 de maju

Dae su 18 de maju podent torrare a cumintzare sos allenamentos de sos isport de iscuadra, respetende sa distàntzia sotziale e a ghennas serradas.

Dae su 18 de maju si podet fàghere atividade isportiva o motòria in foras respetende sa distàntzia de nessi 2 metros tra pare pro atividade isportiva e de nessi unu metru pro totu sas àteras atividades.

Dae su 25 de maju podent torrare a abèrrere sas palestras, sas piscinas e sos tzentros isportivos, respetende semper sas règulas de su distantziamentu sotziale e sentza chi ddoe apat trumas de gente.

ATIVIDADES LÙDICU RICREATIVAS

comente torrare a abèrrere cun su D.L n.33 e su DPCM de su 17 de maju

Dae su 18 de maju torrant a abèrrere sos museos respetende semper sa distàntzia de seguresa de unu metru tra pare

Dae su 15 de làmpadas ant a torrare a abèrrere teatros, tzìnemas e salas pro cuntzertos, fintzas in foras, cun unu nùmeru màssimu de gente (200 in logu serradu, 1000 in logu abertu)

Dae su 15 de làmpadas s'ant a pòdere fàghere atividades lùdicas, ricreativas e educativas pro pitzinnos, in logu serradu o in foras.

ATIVIDADES LÙDICU RICREATIVAS

FINTZAS A SU 14 DE LÀMPADAS

Sighint a abarrare serrados sos servìtzios educativos pro sos pitzinnos, sas atividades didàticas in sas iscolas, in sas universidades e in sos cursos de formatzione

Sighint a abarrare serradas sas atividades chi si faghent in sas salas de ballu, in discoteca in sas fieras e cungressos.

TZELEBRATZIONES LITÙRGICAS

Dae su 18 de maju si podent fàghere totu sas funtziones religiosas respetende sos protocollos de seguresa e sas règulas de su distantziamentu sotziale

MESURAS DE PREVENTZIONE IGIÈNICU SANITÀRIAS

Tocat a fàghere a mancu de èssere in unu muntone de gente in logos pùblicos o abertos a su pùblicu

Sas manifestatziones, sos eventos e sos ispetàculos de cale si siat genia e cun su pùblicu, fintzas cussos de natura culturale, lùdica, isportiva e fierìstica, e totu sas atividades de cunvènnios e cungressos, in logu pùblicu o abertu a su pùblicu, si faghent, cando at a èssere pòssibile in base a s'andamentu de sos datos epidemiològicos, segundu cantu istabilidu in sos DPCM .

Su sìndigu podet detzìdere de serrare giassos ispetzìficos pùblicos o abertos a su pùblicu in ue no est pòssibile a garantire comente s'ispetat su respetu de sa distàntzia de seguresa mìnima de unu metru tra pare.

Sas riuniones si faghent respetende sa distàntzia mìnima de seguresa de unu metru nessi tra pare

MESURAS DE PREVENTZIONE IGIÈNICU SANITÀRIAS

In sos logos serrados, abertos a su pùblicu, est òbligu a portare sas mascareddas

Non tenent s'òbligu de si pònnere sa mascareddas sos pitzinnos chi no ant cumpridu sos 6 annos e chie tenet una disabilidade e non dd'aguantat.

Si podent portare mascareddas de comunidade, cheret nàrrere cussas de usare una borta ebbia o de samunare, fintzas fatas in domo, in materiale multistrato chi ammuntent murru e nare.

SANTZIONE AMMINISTRATIVA

Chie non respetat sas dispositziones de su decretu Lege n.33 at a pagare una contraventzione chi dae 400 podet lòmpere fintzas a 3.000 èuros.

Si sa violatzione de lege dda faghet un'atividade econòmica, produtiva e sotziale, in prus de s'àteru s'at a aplicare sa santzione amministrativa atzessòria chi previdit de fàghere serrare s'atividade dae 5 a 30 dies.

SANTZIONE PENALES

Chie non respetat sa barantena est castigadu, a sos sensos de s'art. 260 R.D. de su 27 de trìulas 1934, n.1265 (TULS) cun sa presone dae 3 a 18 meses e devet fintzas pagare una contraventzione chi dae 500 podet lòmpere a 5.000 èuros.

A.F.

torna all'inizio del contenuto
torna all'inizio del contenuto