Vai a sottomenu e altri contenuti

Museu de su costùmene traditzionale e de su linu

Intro de sas cosas bellas e de sos monumentos chi agatamus in Busache atentzione manna mèritat de seguru su Museu de su costùmene traditzionale busachesu e de comente si traballaiat su linu.
Su museu est in sa crèsia de Santu Domìnigu (de su 1500), a die de oe iscunsacrada, chi sos busachesos mutint 'Cunventu' ca in antighidade in su giassu de sa crèsia ddoe fiat fintzas su cunventu de sos paras de Santu Domìnigu. Sa crèsia puru est bella meda giai de sé. Su museu est partzidu in duas setziones
Una est totu dedicada a sos costùmenes e s'àtera a su linu: dae cando si poniat su terrinu a sèmene a cando si filaiat.
Si cumintzat pròpiu dae comente si pastinaiat e s'arribat a pagu a pagu a comente si filaiat e tessiat pro fàghere totu su chi podiat bisongiare ònnia die e in sas dies de festa. Si podet bìere sa bestimenta de si pònnere in sas diferentes ocasiones e a segunda de sas situatziones de sa vida, dae sas ocasiones prus importantes, tzerimònias e festas, a sas prus malas e tristas comente su dolu, dae sa bestimenta prus sèmplitze de portare ònnia die fintzas a cussa de sos pitzinnos de naschidòrgiu e pitzocheddos. Bestimenta antiga in pannu e foresi, camisas de linu e cotone, imbustos de brocau, seda e belludu tèssidos totu a manos chi faghent a cumprèndere cantu fiant àbiles sas fèminas busachesas, chi ant fatu un'arte de su traballu issoro, costoida cun gelosia e imparada dae sas mamas a sas fìgias.
Agatamus fintzas totu sas fases: dae su frore de su linu fintzas a arribare a su pannu tèssidu.

Sos costùmenes sunt espostos in sa navada de mesu de sa crèsia e partzidos in:
• costùmenes de tzerimònia, de òmine e de fèmina, chi si portant pro si cojuare ebbia;
• costùmenes de sas festas nòdidas e de cussas prus pagu nòdidas;
• costùmenes de portare ònnia die, chi si connoschent ca sunt prus sèmplitzes meda
• costùmenes de si pònnere pro su dolu;
• costùmenes de sos pitzinnos de naschidòrgiu e de sos pitzocheddos.


Sa capella laterale e sa sagrestia sunt dedicadas totu a su linu.
In prus de su linu e de totu sas fases de traballu, sunt espostos totus sos trastos pro ddu manigiare: a cumintzare dae su aradu de linna pro arare su terrinu, su màgiu e su òrgono pro ddu magiare su pètene sa cannugra e su fusu, s'isobidòrgiu, ordidòrgiu e su telàrgiu.
Su giru de su museu finit cun totu sos pannos in linu tèssidos in Busache e ricamados gasi in fine chi non paret mancu chi siant istados tocados dae manu.

Abbàida sas fotografias de su Museu

A.F.

torna all'inizio del contenuto
torna all'inizio del contenuto