Vai a sottomenu e altri contenuti

Su COVID 19 firmat su Fèstival de Gavoi puru

Ocannu diat a dèvere èssere istada sa de XVII editziones de su Fèstival literàriu 'L'isola delle Storie' de Gavoi. Est una manifestatzione culturale de importu mannu chi, dae su 2004, faghet lòmpere ònnia annu in Sardigna, artistas de fama natzionales e internatzionales de su mundu de sa literadura, de sa mùsica, de su tzìnema e de s'ispetàculu.
Dae totu sa Sardigna, sardos, turistas in fèrias e apassionados sèberant de lassare su mare pròpiu in dies de calore forte e de lòmpere a Gavoi, no nde passant contu mancu de abarrare in suta de su sole de trìulas ca s'ispetàculu chi trasmitet Gavoi est de cussos de prima categoria e nde balet pròpiu sa pena de ddu sighire pro mannos e piticos!
S'assòtziu culturale 'L'isola delle storie', chi si incurat ònnia annu de cuncordare sa manifestatzione, dae sa pàgina Facebook sua saludat a totu sos amigos istimados e afetzionados de su fèstival e faghet a ischire ca, a dolu mannu, ocannu Gavoi non b'at a èssere! Cun dispraghere mannu ant dèvidu leare custa detzisione ca non benit a bene a ddu cuncordare. Cun custa emergèntzia dae COVID 19 s' arriscat meda e sa garantzias sanitàrias sunt pagas.
Tzertu, si diant a pòdere leare istradas diferentes pro ddu fàghere su matessi e totus diant a pòdere andare bene ma, comente ant naradu sos organizadores, (e comente ischit bene chi ddoe est andadu nessi una borta in vida sua) Gavoi in streaming non si podet fàghere!!!! Gavoi in streaming non benit a bene......Gavoi in streaming non est sa matessi cosa!!!!
E duncas sa detzisione est belle che leada: su fèstival ocannu s'at a firmare! Ma a su chi paret sunt giai prontos a torrare ocannu chi benit cun un'editzione segura, reale de cussas chi non s'ant a pòdere ismentigare...

A.F.

torna all'inizio del contenuto
torna all'inizio del contenuto