Vai a sottomenu e altri contenuti

Prescritziones contra a sos fogos pro su 2020

Ordinàntzia de su Sìndigu n.13 de su 21 de maju 2020

Si faghet a ischire a sos tzitadinos ca su Sìndigu at fatu s'ordinàntzia nùmeru 13 de su 21 de maju de su 2020 cun sas prescritziones contra a sos fogos pro su 2020.
INTRO DE SU 15 DE LÀMPADAS tocat a pulire terrinos, ortos e giardinos dae molas de arrù e erba mala. Totu sos meres o sos chi tenent terrinos a intro de sa bidda de Samugheo o a inghìriu de sa bidda devent intro de su 15 DE LÀMPADAS 2020, messare s'erba, illetzire su logu dae àtera àliga chi ddoe podet àere.
Sos meres de sos terrinos chi ferint in s'oru de istradas comunales, foras dae sa bidda, caminos de sartu devent INTRO DE SU 15 DE LÀMPADAS DE SU 2020: innetare e fàghere doas, de 3 metros nessi, dae su caminu, segare sas molas de arrù, su fenu e totu s'àtera brutesa de cale si siat ratza chi podet leare fogu, e fintzas cantos de imbìrdiu. Devent pulire sas cresuras, pudare sas naes de sas matas chi essint a foras dae su cungiau a cara a s'istrada e ammuntant sa signalètica istradale. Nche devent bogare dae mesu cale si siat ratza de àliga chi ddoe podet àere pro respetare sas dispositziones de sas normativas in vigore.
Tocat a fàghere sas doas fintzas oru oru de muru.
Sos meres de caminos de sartu chi sunt a usu pùblicu tocat chi INTRO DE SU 15 DE LÀMPADAS nche messent su fenu, sas molas de arrù e nche leent totu s'ispatzadura dae sos caminos chi ferint in su terrinu issoro e dae sos giassos a canta.
Tocat a lassare sos terrinos netos pro totu su trincu de tempus chi abarrat mannu s'arriscu de pigare fogu in sos buscos, dae sa prima die de làmpadas a su 31 de su mese de santugaine.
Sos meres de su terrinu o chie ddu tenet in afitu si devet incurare de nche leare immediatu totu s'àliga e s'ispatzadura chi nde essit a campu e de nche dda fuliare a in ue s'ispetat.
Sos Entes chi sunt meres o chi gestint àreas in ue ferint istradas, intro su matessi tempus istabilidu, su 15 de làmpadas de su 2020, si devent incurare de nche segare su fenu, molas de arrù e de nche bogare de mesu totu s'ispatzadura chi nde essit a campu, in s'oru de sos caminos de cumpetèntzia issoro e in sos giassos a canta pro unu tretu de 3 metros nessi.
Sos sugetos cumpetentes a sos sensos de su D.Lgs. 285/1992 de su Còditze de s'istrada sunt obligados a pulire, recuperare o nche fuliare totu s'àliga chi agatant in sos caminos o in sos tretos a canta semper de cumpetèntzia issoro, pro garantire sa seguresa, sa pulitzia e fàghere a mancu chi si peset fogu.
Sas prescritziones contra a sos fogos abarrant in vigore totu su trincu de tempus chi abarrat mannu s'arriscu de pigare fogu in sos buscos dae sa prima die de làmpadas a su 31 de su mese de santugaine de su 2020.

A.F.

torna all'inizio del contenuto
torna all'inizio del contenuto