Vai a sottomenu e altri contenuti

Fascìculu Sanitàriu Eletrònicu

FASCÌCULU SANITÀRIU ELETRÒNICU

Sos documentos sanitàrios tuos prontos luego e semper a disponimentu

01. Ite est

Su Fascìculu Sanitàriu Eletrònicu est un'àrea riservada dedicada a sos documentos e datos sanitàrios tuos, chi si podet consultare semper e in totue cun unu click fàtzile.

02. A ite serbit

Cun su Fascìculu Sanitàriu Eletrònicu tenes a disponimentu totu sos documentos sanitàrios comente prescritziones, refertos, tzertificados. Ogni documentu ddu podent luego luego consultare fintzas sos dotores chi ti sunt curende e sos potecàrios a segunda de sas impostatziones tuas de riservadesa. Podes retirare sas meighinas prescritas sentza fàghere bìere sa retzeta in paperi a su potecàriu. In prus, in su Fascìculu tuo bi podent èssere informatziones indispensàbiles in casu de emergèntzia chi sos dotores de Prontu Sucursu podent consultare in cale si siat momentu.

03. Comente s'ativat

Su Fascìculu tuo est giai ativu, comente prevididu dae s'art. 11 de su Decretu Rilancio (D.L. 34/2020 de su 19.05.2020). Ativende fintzas sa consultatzione, sos operadores sanitàrios (mèigos e potecàrios) podent bìere luego luego sos documentos tuos. S'ativat clichende subra 'accedi al tuo Fascicolo' e firmende su mòdulu apòsitu o si no ti podet agiudare un'operadore in sos isportellos ASSL e in sas potecarias.

04. Comente si consultat

Podes intrare in su Fascìculu Sanitàriu Eletrònicu tuo dae su dispositivu tuo collegadu a internet e ponende s'autèntica cun sa TÈSSERA SANITÀRIA tua o cun sos còditzes SPID.

05. Riservadesa

Podes detzìdere si sos documentos sanitàrios chi bi sunt in su Fascìculu Sanitàriu Eletrònicu tuo ddos podent consultare sos operadores sanitàrios (mèigos e potecàrios) registrende su cunsensu pro ddos pòdere consultare. In prus podes detzìdere unu livellu de riservadesa ispetzìficu pro ogni documentu sanitàriu eletrònicu.

Su Fascìculu Sanitàriu Eletrònicu est una 'cartella virtuale' in ue est custoida totu s'istòria mèdica de s'utente, fintzas sos refertos de laboratòriu, comente sos èsitos de sos test molecolares pro su Coronavirus.

Apenas chi su Laboratòriu Anàlisi at a tènnere s'èsitu de su test, dd'at a carrigare in su Fascìculu Sanitàriu Eletrònicu suo e s'interessadu diretu dd'at a pòdere consultare luego luego. Fintzas su dotore de famìllia o su pediatra de su patziente ant a pòdere consultare su refertu, ma solu si sa persone interessada at dadu unu cunsensu craru pro sa consultatzione.

Su Fascìculu Sanitàriu Eletrònicu est giai ativu pro efetu de su Decretu Rilancio.

Pro ddu consultare tocat a intrare in: fse.sardegnasalute.it

Comente potzo autorizare su dotore de famìllia o su pediatra pro intrare a bìere sos documentos sanitàrios meos?

Pro ddu fàghere bastat de mandare unu messàgiu de posta eletrònica a: distretto.oristano@atssardegna.it

indichende in s'ogetu de sa posta eletrònica s'espressada 'Modulo gestione consenso accesso FSE' e allegare:

- còpia de su documentu de identidade

- Mòdulu pro sa gestione de sos cunsensos de su Fascìculu Sanitàriu Eletrònicu (si podet iscarrigare dae su situ de su Comune).

(MM)

torna all'inizio del contenuto
torna all'inizio del contenuto