Vai a sottomenu e altri contenuti

Contributos pro nche leare sos istorbos architetònicos

Cuntzessione contributos pro nche leare sos istorbos architetònicos

Su benefìtziu est sa cuntzessione de contributos pro interventos chi serbint pro nche leare sos istorbos architetònicos in edifìtzios privados chi esistint giai in ue bivent persones cun invalididades o limitatziones funtzionales permanentes (de tipu motòriu e de sos chi non bident).

Rechisidos

Tenent su diritu de presentare sas domandas de contributu:

- sos disàbiles cun invalididades o limitatziones funtzionales permanentes de tipu motòriu e sos chi non bient; - sos chi tenent a càrrigu persones cun disabilidade permanente;

- sos condomìnios in ue bivent sas categorias de benefitziàrios mentovadas in antis;

- sos tzentros o istitutos residentziales pro sos edifìtzios issoro destinados a s'assistèntzia de persones cun disabilidade.

Sas domandas de contributu sunt ammìtidas ebbia pro interventos pro nche leare istorbos architetònicos e si podent dare pro interventos in edifìtzios privados chi esistint giai in ue bivent disàbiles cun invalididades o limitatziones funtzionales permanentes e in edifìtzios impreados comente tzentros o istitutos residentziales pro s'assistèntzia a sos disàbiles.

Sos comunes podent averiguare chi sas domandas non pertochent òperas giai fatas o chi si sunt faghende. Si no est possìbile, a manera materiale o giurìdica, fàghere òperas de modìfica de s'immòbile, sos contributos si podent dare fintzas pro comporare ainas chi, pro sas caraterìsticas issoro resurtent idòneas meda pro lòmpere a sos matessi resurtados chi si diant èssere tentos si s'òpera si fiat pòdida fàghere; s'esempru clàssicu est cussu de su servoscala o de sa carrotzina. Su contributu si podet dare pro òperas de fàghere in partes a cumone de un'edifìtziu (pro nàrrere: intrada de unu condomìniu) o in immòbiles o portziones de sos immòbiles in propiedade esclusiva o in godimentu a su disàbile (pro nàrrere: a intro de un'apartamentu). Su contributu podet èssere erogadu pro un'òpera sìngula (pro nàrrere: fàghere un'artziada de iscala) o pro prus òperas collegadas a manera funtzionale chi cheret nàrrere prus de un'interventu chi serbint pro nche leare prus istorbos chi impedint sa matessi funtzione (pro nàrrere: portone de intrada istrintu meda e iscalas, chi impedint s'intrada a unu sugetu non deambulante). Si de un'interventu ebbia nde podent usufruire prus disàbiles, si dat unu contributu ebbia. Su matessi, cando si depent eliminare prus istorbos, chi impedint sa matessi funtzione, in su matessi edifìtziu tocat a fàghere una domanda ùnica: su contributu at a èssere unu ebbia. Si sos istorbos diferentes impedint imbetzes funtziones diferentes (pro nàrrere: mancat s'ascensore e non si podet usare su servìtziu igiènicu), su disàbile non podet otènnere prus de unu contributu pro ogni òpera netzessària, presentende una domanda diferente pro ogni interventu. Si s'immòbile est sugetu a vìnculos istòricu-artìsticos o ambientales, s'interessadu depet pedire s'autorizatzione pro s'interventu a sas autoridades cumpetentes. In prus, si s'immòbile est de sa categoria de sos edifìtzios cun disponimentos pretzisos pro sos logos sìsmicos, su rechedente depet acumprire s'òbligu de su preavisu e de mandare su progetu a sas autoridades cumpetentes.

Normativa

Lege n. 13 de su 1989

Documentos de presentare

Sa domanda si depet presentare

- a su sìndigu de su comune in ue est s'edifìtziu,

- in carta bullada,

- a intro de su 1u de martzu de ogni annu,

- da depet presentare su disàbile (o chie nde esèrtzitat sa tutela o sa podestade) pro s'edifìtziu in ue issu tenet sa residèntzia abituale e pro òperas de fàghere pro nche leare sos istorbos a sa mobilidade sua.

In casu siant prus de unu sos disàbiles chi diant a pòdere usufruire de su matessi interventu sa domanda podet èssere fata dae unu o dae prus de unu de issos; pro ogni òpera, semper e cando, at a èssere dadu unu contributu ebbia.

Imbetzes non podent presentare domanda àteros sugetos, nemmancu sos chi (pro nàrrere, su propietàriu de s'immòbile o s'amministradore de su condomìniu) faghent s'ispesa podent èssere titulares de su diritu a sos contributos: si s'òpera est fata a ispesa de sugetos chi non sunt su disàbile sa domanda dda depet firmare su disàbile comente cunfirma de su chi ddu est iscritu e pro adesione. Custu cheret nàrrere ca cando unu contributu est pedidu dae unu condomìniu at a èssere su disàbile a presentare sa domanda, fintzas si su benefitziàriu de su contributu at a èssere a pustis su chi at tentu a beru s'ispesa. In sa domanda, difatis, si depet indicare su sugetu chi tenet su diritu de su contributu, chi si depet identificare cun chie at a beru fatu s'ispesa pro fàghere s'òpera.

Custu podet èssere, duncas, su disàbile chi at presentadu sa domanda si at a èssere issu a fàghere s'ispesa o podet èssere su familiare chi tenent in càrrigu fiscale su disàbile. In su casu sas ispesas ddas fatzat su condomìniu in sa matessi domanda si depet indicare su nùmene de s'amministradore.
Resumu: a presentare sa domanda est semper su disàbile (o su curadore o su tutore), su benefitziàriu de su contributu, imbetzes, podet èssere fintzas un'àtera persone chi apat fatu a beru s'ispesa.

A pustis de àere presentadu sa domanda sos interessados podent fàghere sos traballos sentza isetare chi acabbet su protzedimentu amministrativu e, duncas, currende s'arriscu chi su contributu potzat èssere non dadu.

Iscadèntzia pro presentare sa domanda

A intro de su1u de martzu de ogni annu.

Ite si depet allegare a sa domanda

A sa domanda si depet allegare sa descritzione, fintzas unu resumu, de sas òperas e de s'ispesa previdida. Non est netzessàriu unu preventivu analìticu ne ischire si dd'at fatu unu tècnicu o espertu, mancari pro sas òperas de una tzerta entidade si cussìgiat chi su traballu siat fatu dae unu progetista.

A sa domanda si depent allegare su tzertificadu mèdicu e un'autotzertificatzione.

Su tzertificadu mèdicu, in paperi sèmplitze, ddu podet fàghere e firmare chie si siat mèigu, depet atestare sa disabilidade de su rechedente, pretzisende dae cales maladias dipendet e cales sunt a beru sas dificultades a si mòvere chi càusant, pretzisende, si serbit, ca sa disabilidade est un'invalididade o limitatzione funtzionale permanente.

Si a su disàbile est connota dae sa ASL cumpetente s'invalididade totale cun dificultade de deambulatzione, si si cheret usufruire de sa pretzedèntzia previdida in s'assignatzione de sos contributos, si depet allegare fintzas sa tzertificatzione relativa de sa ASL; si pensat chi si potzant atzetare fintzas tzertificatziones de invalididade fatas dae àteras cummissiones pùblicas (pro nàrrere: invalididade de gherra, servìtziu, traballu, àteru).

S'autotzertificatzione depet decrarare in ue est postu s'immòbile in ue bivet su rechedente e in ue si cheret fàghere s'interventu, (carrera, nùmeru tzìvicu e casu mai s'internu). In prus, si depent descrìere in curtzu sas dificultade a sa mobilidade collegados a s'esistèntzia de istorbos o a sa mancàntzia de signalatziones.

In prus s'interessadu depet decrarare chi sos interventos de fàghere cun su contributu chi si est pedende non sunt giai fatos e nen si sunt faghende. Depet fintzas pretzisare si pro sos matessi traballos ddi apant dadu àteros contributos.

De norma, pro otènnere contributos su disàbile depet tènnere a beru a manera istàbile e abituale dimora in s'edifìtziu in ue si cherent fàghere sos traballos. Non b'at diritu a sos contributos si s'immòbile est ebbia dimora ocasionale o istagionale o precària; in prus, si perdet su diritu de su contributu si a pustis de àere presentadu sa domanda o a pustis de àere fatu sos traballos si càmbiat domo.

Semper e cando sa domanda si podet presentare fintzas pro traballos de fàghere in immòbiles e/o unidades immobiliares sìngulas, chi ant a èssere s'abitatzione o dimora de sa persone cun disabilidade a pustis de àere presentadu sa domanda. In custu casu s'erogatzione de su contributu tenet su vìnculu de èssere averiguada dae parte de su Comune pro apurare custa cunditzione.

A pustis de àere presentadu sa domanda sos interessados podent fàghere sos traballos sentza dèpere isetare s'acumprimentu de su protzedimentu amministrativu e, duncas, cun s'arriscu chi sa cuntzessione de su contributu non s'otèngiat.

Allegados

ALLEGADU DECRARATZIONE SOSTITUTIVA

DOMANDA DISÀBILES

AVISU BANDU DISÀBILES

(MM)

torna all'inizio del contenuto
torna all'inizio del contenuto