Vai a sottomenu e altri contenuti

Avisos e àutos in limba sarda de su Comune de Nughedu

COVID 19: SAS LÌNIAS GUIDA DE SA FASE 2. SAS MESURAS NOAS DE SU DECRETU LEGE DE SU 16 DE MAJU 2020 N.33 E DE SU DPCM DE SU 17 DE MAJU 2020

ITE CÀMBIAT DAE SU 18 DE MAJU

Sas dispositziones de su D.L. n.33 balent a cumintzare dae su 18 de maju e fintzas a su 31 de su mese de trìulas.

Sas dispositziones de su DPCM de su 17 de maju balent a cumintzare dae su 18 de maju e fintzas a su 14 de làmpadas e càmbiant cussas istabilidas dae su DPCM de su 26 de abrile.

Su D.L. n.33 faghet riferimentu a 2 datas pro s'aplicatzione de sas mesuras su 18 de maju e su 3 de làmpadas.

MÒVIDAS: ITE CÀMBIAT DAE SU 18 DE MAJU
-A intro de sa matessi regione si podet lòmpere in totue
-Non ddu at bisòngiu de s'autotzertificatzione
-Si podent torrare a bìere sos amigos
-Est vietadu a èssere in truma de gente in logos pùblicos o abertos a su pùblicu

MÒVIDAS: ITE CÀMBIAT DAE SU 3 DE LÀMPADAS
-Si podet andare in diferente regione
-Si podet mòvere dae e pro lòmpere a s'Unione Europea, sos Istados Schengen, su Regnu Unidu, sa Repùblica de San Marino, su Printzipadu de Mònacu
-Sas mòvidas ant a pòdere èssere limitadas, cun DPCM fatos a posta, in àreas pretzisas de su territòriu natzionale o in Istados ispetzìficos, pro su rìschiu epidemiològicu

MÒVIDAS: ITE ABARRAT TOTUNU FINTZAS A SU 3 DE LÀMPADAS
Si podet lòmpere dae una regione a s'àtera solu pro:
- Motivos de traballu
- Urgèntzia manna
- Motivos de salude
- Torrare a su domitzìliu o a su logu de residèntzia -Sos chi sunt in barantena non podent essire dae domo issoro

Sighi a lèghere…..

A.F.

Bandu de cuncursu pro su pagamentu de contributos in favore de sos assignatàrios de allògios E.R.P. de propiedade de s'A.R.E.A. unidade territoriale de Aristanis

SI FAGHET A ISCHIRE A TOTU SOS INTERESSADOS CA

Est istadu publicadu su Bandu de cuncursu pro su pagamentu de contributos in favore de sos assignatàrios de allògios de Edilìtzia Residentziale Pùblica de propiedade de s' A.R.E.A. Unidade territoriale de Aristanis.

Paris a sa domanda tocat a pònnere sa fotocòpia de unu documentu de identidade de sa persone chi dda presentat e s'atestatzione de ''efetivu disàgiu econòmicu'' aprontada dae su Servìtziu Sotziale de su comune de residèntzia, sentza de custu documentu non si podet partetzipare a su Bandu.

Pro cumprèndere a chie ispetat su contributu e comente cheret presentada sa domanda tocat a lèghere cun atentzione su BANDU.

S'avisu, su bandu e su mòdulu de domanda sunt publicados e si nde podent iscarrigare dae su situ situ de su comune de Nughedu o intrende in su situ de s'Azienda www.area.sardegna.it in sa setzione Bandi e gare - Fondo sociale.

Su tempus pro presentare sas domandas iscadit su 21 de trìulas de su 2020

A.F.

BURSA DE ISTÙDIU NATZIONALE ANNU ISCOLÀSTICU 2019/2020

BURSA DE ISTÙDIU NATZIONALE IN FAVORE DE SOS ISTUDIANTES DE SAS ISCOLAS SEGUNDÀRIAS DE SEGUNDU GRADU - D.LGS 13/04/2017 N.63

ANNU ISCOLÀSTICU 2019/2020

A V I S U

SI FAGHET A ISCHIRE A SA TZITADINÀNTZIA CA SI PODET PRESENTARE DOMANDA PRO TÈNNERE SA BURSA DE ISTÙDIU NATZIONALE PRO SOS ISTUDIANTES DE SAS ISCOLAS SEGUNDÀRIAS DE SEGUNDU GRADU, ISTATALES E PARITÀRIAS, PRO S'ANNU ISCOLÀSTICU 2019/2020.

PRO PRESENTARE SA DOMANDA PRO SA BURSA DE ISTÙDIU TOCAT A:


1. èssere iscritos pro s'annu iscolàsticu 2019/2020 a un' iscola segundària de segundu gradu de su sistema natzionale de istrutzione (iscolas istatales e paritàrias);

2. èssere in una famìlia chi tenet una Situatzione Econòmica Ecuivalente (I.S.E.E.) chi torrat in sos 14.650,00 èuros;

3. compilare su mòdulu de domanda e allegare custos documentos:

•fotocòpia de s'atestatzione de s'ISEE in cursu de valididade lassadu a sos sensos de sa normativa previdida dae su DPCM n.159/2013;
•fotocòpia de su documentu de reconnoschimentu de chie faghet domanda in cursu de valididade.

4.Presentare sa domanda a su Comune de residèntzia (Ufìtziu: AFÀRIOS GENERALES/PROTOCOLLO) intro de su 15 de LÀMPADAS 2020. Podet presentare sa domanda unu genitore, su rapresentante legale de s' istudiante o s' istudiante e totu si tenet sos 18 annos fatos.

5.Sa domanda si nche podet mandare fintzas in sa posta eletrònica tzertificada e/o ordinària (segundu su chi sèberat su comune) a custu indiritzu: maria.caboni@comunenughedusv.it pec: affarigenerali.nughedusv@pec.comunas.it.

Su comune s'at a incurare de nche mandare s'elencu de sos istudiantes ammìtidos a sa Regione Sarda, chi at a aprontare una graduatòria ùnica regionale, fata cumintzende dae s'ISEE prus bassu e creschende, in casu de ISEE totunos, intrat in antis s'istudiante prus giòvanu. S'elencu de sos istudiantes chi ant a èssere in graduatòria, est a nàrrere cussos chi ant a retzire sa bursa de istùdiu, nch'at a èssere mandadu a su Ministeru de s'Istrutzione Pùblica. A sos chi ispetat sa bursa de istùdiu ant a retzire unu bonìficu domitziliadu e su Ministeru de s'Istrutzione at a istabilire cando e comente. Sa bursa de istùdiu est de 200 èuros onniuna.

INFORMATIVA PRIVACY - Su Ministeru de s'Istrutzione at aprontadu s'informativa pro sa privacy chi agatades publicada in su situ de su Comune de NUGHEDU SANTA VITòRIA e in su situ de su Ministeru: https://iostudio.pubblica.istruzione.it/web/guest/voucher.


MODULÌSTICA E INFORMATZIONES - Sa modulìstica chi si depet usare est disponìbile in su situ de sa Regione Sarda: www.regione.sardegna.it, e in su situ de su Comune: www.comunenughedusv.it e in s' Ufìtziu AFÀRIOS GENERALES/PROTOCOLLO


Pro totu sas informatziones:

COMUNE - Ufìtziu: AFÀRIOS GENERALES/PROTOCOLLO

Telèfono: 0783 69026

E-mail: maria.caboni@comunenughedusv.it / claudio.zago@comunenughedusv.it

Pec: affarigenerali.nughedusv@pec.comunas.it

MINISTERU DE S'ISTRUTZIONE situ web https://iostudio.pubblica.istruzione.it/web/guest/voucher e mail iostudio@istruzione.it

NUGHEDU SANTA VITÒRIA (OR), su 5 de maju 2020

SU SÌNDIGU

Francesco Mura

A.F.

AVISU PÙBLICU
Presentatzione domandas BONUS BEBÉ 2020

S'Amministratzione Comunale, pro èssere de agiudu in su 2020, a sas famìlias, e prus che àteru a cussas chi si sunt formadas pagu tempus a como, mescamente cando naschet unu fìgiu, cosa chi cumportat pro una famìlia ispesas meda; at pentzadu de intervènnere in custu tempus de crisi econòmica chi s'est faghende a intèndere in Nughedu Santa Vitòria puru.
Pro su 2020 s'Amministratzione Comunale, cheret dare unu 'Bonus Bebè' de 1.500,00 èuros pro su primu fìgiu e de 2.000,00 èuros pro onni fìgiu a pustis de su primu, una tantum chi si dat cando naschet unu pitzinnu.
Podent fàghere domanda totu sos nùcleos familiares chi:
• tenent unu fìgiu nàschidu tra sa prima die de ghennàrgiu e su 31 de nadale 2020;
• tenent sa residèntzia in su Comune de Nughedu Santa Vitòria de su pitzinnu nàschidu a nou, o de su pitzinnu adotadu, e nessi de unu de sos genitores;
• no ant retzidu pro sa matessi cosa unu contributu in un àteru comune diferente.
S'ISEE de su nùcleu familiare non devet èssere prus artu de 49.000,00 èuros
Su tempus pro presentare sa domanda iscadit su 31 de nadale 2020

Sa domanda cheret presentada in su mòdulu aprontadu aposta dae su Comune (chi si nde podet retirare in Comune o iscarrigare dae su situ istitutzionale) paris a custos àteros documentos:

-fotocòpia de unu documentu de chie faghet sa domanda;
-dichiaratzione sostitutiva de tzertificatzione de s'istadu de famìlia e residèntzia (art. 46 de su T.U. 445/2000);
-dichiaratzione sostitutiva de tzertificatzione de sa nàschida de su pitzinnu;
-dichiaratzione ISEE chi cumprovet su rèdditu de su nùcleu familiare pro s'annu 2018.
Sa domanda cheret presentada a s'Ufìtziu de su Protocollu de su Comune de residèntzia intro de su primu annu de vida de su pitzinnu o, in casu de adotzione, intro de un annu dae s'atu definitivu de adotzione.
Chie tenet bisòngiu de àteras informatziones o de una manu de agiudu pro compilare sa domanda podet lòmpere a comune a s'ufìtziu de sos servìtzios sotziales in oràriu de abertura o telefonare a su nùmeru 0783/69026.

Avisu pùblicu

A.F.

Bandu pro assignare contributos in agiudu de chie tenet cuntratos de afitu -Lege 431/98

Si faghet a ischire a totu sos interessados ca a sos sensos de sa Lege 431 de su 9 de nadale1998 art.11 e de su D.M. de sos Traballos Pùblicos de su 7 e làmpadas 1999 sunt abertos sos tèrmines pro presentare sas domandas pro tènnere contributos integrativos pro pagare s'afitu de domo. Annualidade 2020 Meses de ghennàrgiu-abrile
Su tempus pro presentare sas domandas iscadit chenàbura su 30 de maju 2020 a sa una (h.13.00).
Podent presentare domanda de contributos integrativos pro su 2020 totu sos chi, sa die chi faghent domanda:
-tenent unu cuntratu de afitu registradu in manera regulare, de domos a usu residentziale chi sunt in su comune de Nughedu Santa Vitòria e in ue bivent comente domo printzipale o esclusiva, bastet chi s'afitu non siat pro domos chi intrant in sas categorias de su catastu A1, A8 e A9;
- sunt residentes in su comune de Nughedu Santa Vitòria cando faghent sa domanda;
-tenent unu rèdditu imponìbile a s'annu chi rientrat in sa FÀSCIA A e FÀSCIA B (abbàida s'avisu allegadu)
Non podet presentare domanda chie:
-bivet o tenet diritu a allògios de edilìtzia residentziale pùblica
-chie est titulare de diritos de propiedade, usufrutu, usu o domo chi respondet a sos bisòngios familiares a sos sensos de s'art. 2 de sa L.R. n.13/89.

Pro àteras informatziones si podet pregontare in s'Ufìtziu de sos Servìtzios Sotziales de su comune.
S'Avisu 2020, su mòdulu de domanda sunt publicados e si nde podent iscarrigare dae su situ istitutzionale de su comune de Nughedu.

A.F.

Emergèntzia Coronavirus (COVID - 19) - DPCM de su 26 de abrile 2020

Su Presidente de su cussìgiu de sos ministros, Giuseppe Conte, su 26 de abrile 2020 at firmadu su DPCM nou chi istabilit totu sas mesuras pro cuntènnere s'emergèntzia dae Covid-19 in sa chi ant numenadu 'FASE 2'.
Sas dispositziones de su decretu ant a èssere aplicadas dae su 4 de su mese de maju 2020 (a su postu de cussas de su DPCM de su 10 de abrile 2020) e ant a bàlere fintzas a su 17 de maju 2020, francu su chi previdit s'art.2, commas 7, 9 e 11 chi s'ant a aplicare dae su 27 de abrile 2020 cun totu sas àteras dispositziones de su DPCM de su 10 de abrile 2020.
S'ant a sighire a aplicare sas mesuras de cuntenimentu prus restritivas chi ant adotadu sas Regiones, in cuntzertu cun su Ministru de sa Salude, in àreas ispetzìficas de su territòriu regionale.
Sas novidades de su DPCM de su 26 de abrile, chi su Premier Conte at presentadu domìniga sero in cunferèntzia istampa sunt medas, in custu decretu nou su Guvernu cheret istabilire sas mesuras chi ant a èssere ativas dae su 4 de maju 2020 e pro sas duas chidas in vatu.

Ite narat su decretu nou?

Su DPCM nou istabilit s'òbligu de abarrare acorradu in domo e de avisare su dotore a totu cussos chi tenent sìntomos respiratòrios e portant callentura a prus de 37 e mesu.

Torrant a abèrrere parcos, giardinos e villas, faghende semper atentzione a respetare sa distàntzia minima de seguresa e a non èssere unu muntone de gente totu paris: in su decretu ddu est iscritu ca su Guvernu lassat a sos sìndigos sa possibilidade de detzìdere si apèrrere o sighire a lassare serrados sos parcos si non sunt in cunditzione de garantire chi siant respetadas sas normas de seguresa.

Atividade isportiva e motòria: pro ambas duas su decretu previdit ca de su 4 de maju si potzant fàghere fintzas prus a tesu de 200 metros dae sa pròpia domo, s'atividade isportiva respetende sa distàntzia de 2 metros tra pare, pro s'àtera cussa de 1 metru. Sos atletas professionistas de isport individuales podent torrare a cumintzare sos allenamentos, a sa sola e a ghennas serradas giai dae su 4 de maju e de iscuadra a cumintzare dae su 18 de su mese chi intrat.

Un àtera novidade manna in contu de tzerimònias religiosas est cussa de torrare a abèrrere sas crèsias pro sos interros, chi si esseret possìbile diat èssere mègius a ddos fàghere in foras e ddoe podent leare parte non prus de 15 persones intre sos parentes de primu e segundu gradu.

Semper a cumintzare dae su 4 de maju sas atividades de ristoratzione nche podent leare sos òrdines a domitzìliu ma si podet fintzas abèrrere pro chie cheret andare in persone a nde retirare sa cosa de papare de si nche leare a domo o a su logu de traballu.

A cumintzare dae su 4 de maju su decretu nou permitit de torrare a cumintzare a traballare a su setore de sa manifatura, a cussu edile, de intermediatzione immobiliare paris a totu cussas atividades a s'ingrosso ligadas a custos setores. Dae su 27 de abrile custas categorias podent giai cumintzare a fàghere totu su netzessàriu pro si preparare a cumintzare a abèrrere: sanificatzione de sos locales e semper cun s'òbligu de respetare sas règulas giai in vigore in matèria de seguresa in su traballu.

In fines tocat a nàrrere ca custu ùrtimu decretu at istabilidu unu protzessu de controllu e coordinamentu intre s'Istadu e sas Regiones pro tènnere contu de sos efetos pro àere allenadu sas mesuras restritivas '' Nos assumimus sos rischios de torrare a apèrrere -at naradu su Presidente Conte- ma tocat a leare totu sas precautziones netzessàrias''

' [...] Gràtzias a sos sacrifìtzios fatos finas a como nche semus resurtados a cuntènnere sa difusione de sa pandemia e custu est una cosa manna cunsiderende ca in sa fase prus acuta amus tìmidu de non pòdere controllare prus nudda. Ais tentu totus fortza, coràgiu, sensu de responsabilidade e sensu de comunidade. Como cumintzat pro totus sa fase in ue tocat a bìvere paris a su virus e depimus pònnere in contu ca in custa fase noa, sa fase 2, podet èssere chi sa curva de sos contàgios nche torret a pigare in carchi tretu de sa natzione. Tocat a ddu nàrrere craru ca custa cosa podet capitare. In custa fase 2 est ancora prus importante a mantènnere sa distàntzia sotziale finas in sa matessi famìlia.'

Inoghe su testu cumpletu de su DPCM de su 26 de abrile 2020

Abbàida sa Cunferèntzia Istampa de su Presidente Conte

A.F.

BIBLIOTECA ON LINE

Su sistema bibliotecàriu de Barigadu at aderidu a MediaLibraryOnline una piataforma chi dat a ònnia biblioteca sa possibilidade de fàghere unu servìtziu de prèstidos digitales.

DAE SU 20 DE ABRILE TOTU SOS UTENTES INTERESSADOS PODENT TÈNNERE SU SERVÌTZIU

Comente fàghere pro si nche iscrìere:

Sos utentes interessados depent dare sos datos issoro telefonende o mandende una mail (cumpleta de nùmene, sambenadu, còditze fiscale e indiritzu de posta eletrònica) a s'operadore de sa biblioteca chi nch'at a registrare a s'utente in sa piataforma e dd'at a dare unu nùmene utente (username) e unu faeddu pro intrare (password) chi dd'ant a permìtere de intrare a sa piataforma www.medialibrary.it.
S'utente a pustis at a retzire una mail pro cumpletare s'abilitatzione. Finidos totu sos passàgios, s'utente est abilitadu e podet tènnere a dispositzione, diretamente dae domo sua, totu sos servìtzios chi ddi bisòngiant .

Comente fàghere pro intrare a su servìtziu:

Tocat a intrare a sa piataforma www.medialibrary.it
Dae su menù a tendina tocat a seletzionare 'sistema bibliotecario del Barigadu' e a pònnere sas credentziales personales. In custa manera si podet intrare ònnia die e a cale si siat ora de sa die e seberare intro de sos diferentes trastos multimediales chi sa piataforma ponet a dispositzione: ebook, MP3, bancas de datos, films, vìdeos, immàgines, libros de ascurtare, e-learning, cursos de limba, edìcolas (rivistas, giornales, periòdicos natzionales e internatzionales puru). Chie non renesset a si registrare o tenet dificultade in carchi passàgiu (a cumpletare s' abilitatzione, a iscarrigare ebook e film, a consultare s'edìcola, ecc.) podet pregontare una manu de agiudu o unu cussìgiu a sos operadores de sa biblioteca telefonende.los, mandende una mail o podet fintzas intrare a su situ MLOL e andare a sa setzione 'aiuto'.

A.F.

Mesuras istraordinàrias e urgentes in agiudu de sas famìlias pro parare fronte a s'emergèntzia econòmicu-sotziale

Si faghet ischire a totu sos interessados ca est istadu publicadu s'avisu e si podet presentare domanda pro pòdere benefitziare de sos cuntributos de sa Lege Regionale n.12 de su 8 de abrile 2020 'Mesuras istraordinàrias e urgentes in agiudu de sas famìlias pro parare fronte a a s'emergèntzia econòmicu-sotziale nàschida dae sa pandemia de SARS-CO V2'

1. Chie podet presentare domanda
Podent presentare domanda sos nùcleos familiares chi su 23 de freàrgiu de su 2020 resurtant residentes e domitziliados in su Comune:

a) sos cumponentes depent èssere (nessi in una de custas cunditziones):


• traballadores dipendentes o autònomos chi si sunt firmados cun su traballu o ant bistu minimare su traballu issoro pro neghe de s'emergèntzia epidemiològica dae Covid-19 e si sos meres de traballu issoro no ant tentu atzessu a sas formas de integratzione salariale o dd'ant tentu a pustis de su decretu de lege de su 17 de martzu 2020, n. 18;

• traballadores titulares de unu raportu de collaboratzione coordinada e continuativa iscritos a sa gestione separada de categorias econòmicas chi ant dèpidu firmare s'atividade issoro o minimare su traballu pro neghe de s'emergèntzia epidemiològica dae Covid-19;

• titulares de partidas IVA, o sòtzios de sotziedade iscritos a sa gestione de s' asseguratzione generale obligatòria (AGO) de categorias econòmicas chi ant dèpidu firmare s'atividade issoro o minimare su traballu pro neghe de s'emergèntzia epidemiològica dae Covid-19;

• collaboradores de impresas familiares de categorias econòmicas chi ant dèpidu firmare s'atividade issoro o minimare su traballu pro neghe de s'emergèntzia epidemiològica dae Covid-19;

• traballadores abarrados sentza rèdditu de traballu o de impresa dae su 23 de freàrgiu 2020.

b) sas persones chi tenent unu rèdditu chi no arribat a 800,00 èuros netos a su mese, cunsiderende su tempus chi andat dae su 23 de freàrgiu de su 2020 a su 23 de abrile de su 2020.


Inoghe s'avisu cumpletu e su mòdulu de nde iscarrigare pro fàghere sa domanda.

A.F.

Emergèntzia Coronavirus:

s'isportellu linguìsticu sighit a traballare

Si avisat chi, pro more de s'emergèntzia pro sa Covid-19, sas fainas de s'isportellu linguìsticu, fintzas a su 3 de su mese de maju, e francu perlongamentos chi ant a istabilèssere sas autoridades, ant a sighire cun su teletraballu. Sos operadores de isportellu sunt comente si siat a disponimentu pro cale si siat bisòngiu de tradutziones, fainas de interpretariadu, consulèntzias grammaticales e ortogràficas, consulèntzias didàticas, inditos bibliogràficos, sitogràficos,etc.

Sos operadores si podent chircare telefonende ònnia die, intra de sas 8 de mangianu e sas 8 de merie, a su nùmeru 349.6025986 o mandende unu messàgiu a s'indiritzu de posta eletrònica isportellu.limba.barigadu@gmail.com


A.F.

Mesuras urgentes solidariedade alimentare

Bonos pro s'ispesa pro chie est in dificultade econòmica in custu momentu de emergèntzia dae coronavirus

Su Sìndigu

Bista s'ordinàntzia n. 658 de su 29 de martzu 2020 de su Capu de su Dipartimentu de sa protetzione tzivile numenada 'àteros interventos urgentes de protetzione tzivile in relatzione a s'emergèntzia de rìschiu sanitàriu ligadu a sas patologias chi benint dae sos virus chi si podent trasmìtere', cun mesuras e resursas pro sa solidariedade alimentare;


Cunsideradu ca est in s'intentu de s'Amministratzione Comunale su de dare, intro de sos interventos pro sustènnere sas famìlias chi s'agatat in dificultade econòmica pro neghe de s' emergèntzia sanitària dae coronavirus (COVID-19), atentzione manna pro agiudare a sas persones e a sas famìlias dende bonos pro s'ispesa pro pòdere comporare benes de prima netzessidade, in sas butegas cunventzionadas.

Faghet a ischire ca

Si podet presentare domanda pro retzire sos bonos de ispesa pro comporare ALIMENTARES, BENES DE PRIMA NETZESSIDADE, MEIGHINAS e artìculos de parafarmatzia, assignados in favore de persones in dificultade econòmica pro s'emergèntzia dae covid-19, chi ant a sinnalare sos servìtzios sotziales comunales, in su respetu de sos printzìpios de non discriminatzione, paridade de tratamentu, trasparèntzia, lìbera cuncurrèntzia e publitzidade. ònnia bonu de ispesa balet 25 èuros, sunt cumulàbiles, personales (est a nàrrere ca ddos podet presentare su titulare de su bonu ebbia o unu chi at incarrigadu cun dèlega issu e totu), non sunt trasferìbiles, non si podent dare a àteros ne cunvèrtire in dinari.

Si pretzisat ca

1.Cun sos bonos ispesa si podent comporare custa genia de benes:

  • gèneres alimentares: late, pasta, tzùcaru, petza, pane, oos, pische, ògiu, fruta, berdura, iscatuletas, surgelados, alimentos pro sa prima infàntzia, etz;
  • produtos de prima netzessidade pro s'igiene personale comente: sabone, dentifrìtziu, pannolinos pro sos pitzinnos, assorbentes, carta igiènica, etz;
  • produtos de prima netzessidade pro pulire sa domo comente: detersivos, etz;
  • produtos de prima netzessidade pro faghet funtzionare sa cucina e tènnere s'abba callente pro s'igiene personale: bòmbolas a gas, etz;
  • meighinas e artìculos chi agatamus in parafarmatzia.

Sos bonos ispesa si nche devent ispèndere in sos gestores cunventzionados cun su comune ebbia.

Non si podent dare a àtere, duncas, devent resurtare firmados dae su titulare de su bonu ispesa e issu ebbia ddos podet usare o unu chi at delegadu issu;
Non balent comente dinari cuntante e non dant diritu a tènnere restu in dinari;
Su titulare de su bonu ispesa est obligadu a pagare, immediatu e de butzaca sua, si ispendet prus de cantu balet su bonu;

Cun su bonu ispesa NON SI PODENT COMPORARE: alcòlicos (es. binu, birra e super alcòlicos ); cartoleria (si podet comporare solu cosa chi podet bisongiare pro iscola); cosa a papare o àteros produtos pro animales; istrepos e trastos pro sa domo; produtos pro fàghere giardinàgiu; bestimenta, botinos e atzessòrios de abbigliamentu; sigaretas e tabacu.

Onni persone chi at a fàghere domanda at a retzire una telefonada o videotelefonada pro chistionare in persone cun s'operadore sotziale de su comune pro valutare sa richiesta chi at fatu. Su servìtziu sotziale de acordu cun su nùcleu familiare, at a cuncordare comente fàghere pro dare su bonu de ispesa, o cuntatende sa butegas o faghende.nche leare su bonu ispesa in deretura a domo de sa famìlia interessada dae unu dipendente comunale.

Sos bonos ispesa si nche podent ispèndere solu in sas butegas sinnaladas in su situ web de su comune.

Podet presentare domanda cale si siat persone, residente, domitziliada o chi bivet in su territòriu comunale e chi est in una cunditzione de apretu mannu, compilende su mòdulu chi agatat disponìbile:

- in sa versione on-line in su situ de su comune o in sa pàgina APP istitutzionale;

- in paperi in totu sas butegas e in sas farmatzias chi ant aderidu a s'initziativa. Sos mòdulos cumpilados nche devent èssere leados a Comune.

Custu avisu non portat una data de iscadèntzia, duncas, sas persones podent sighire a fàghere domanda fintzas a cando at a bastare su dinari postu a dispositzione. Ònnia chida su servìtziu sotziale s'at a incurare de valutare totu sas domandas chi at a retzire.

Custu avisu, e su modellu pro presentare sa domanda, est publicadu in s'Albu Pretòriu on-line, in su situ istitutzionale de su comune o in su situ de sa Trasparèntzia de su comune.

Pro àteras informatziones sos benefitziàrios ant a pòdere cuntatare sos servìtzios sotziales a custu nùmeru de telèfono: 078369026.

Su Sìndigu

Francesco Mura

A.F.

Avisu pùblicu: iscadèntzia REIS prorogada a su 30 de abrile

Su Responsàbile de su Servìtziu sòtziu assistentziale

faghet a ischire ca

Pro cantu atenet a s'avisu pùblicu cun sas modalidades de atuatzione de sa Lege Regionale n.18/2016 'Rèdditu de inclusione sotziale - Fundu regionale pro su rèdditu de inclusione sotziale 'Agiudu Torrau' REIS 2019/2020, est pretzisu a nàrrere chi s'artìculu 1 in sa parte chi pertocat sos 'recuisitos regionales' est istadu cambiadu segundu cantu narat s'artìculu 13 de sa Lege Regionale de su 5 de nadale 2016, n.32 in:

' [...] podent fàghere domanda pro su REIS 2019/2020 sos nùcleos familiares, fintzas cussos formados dae una persone ebbia, cumpresas:

  • sas famìlias 'di fatto' chi bivent paris, nessi dae 6 meses, cun unu de sos cumponentes chi siat residente a su mancus dae 2 annos in territòriu regionale;
  • sos emigrados torrados in Sardigna e sos nùcleos familiares issoro, pro issos no est netzessàriu a èssere residentes dae duos annos in territòriu regionale.

Su tempus pro presentare sas domandas fissadu pro su 30 de su mese de martzu 2020 est prorogadu a su 30 de abrile 2020.

Abbàida s'avisu

A.F.

Decretu de su Sìndigu n.1 de su 24 martzu/2020: servìtzios indiferìbiles, dispositziones pro sos ufìtzios comunales.

Cun su decretu de n.1 de su 24 de martzu de su 2020 su sìndigu at individuadu sos servìtzios indiferìbiles (chi non si podent rinviare) de fàghere in presèntzia e sas dispositziones pro sos ufìtzios pùblicos comunales, su personale dipendente e pro intrare a sa domo comunale.

Su sìndigu disponet chi:
a) sa domo comunale abarret serrada fintzas a su 3 de abrile de su 2020,

-podet intrare a sos ufìtzios, e pro fàghere sos traballos essentziales, sa persone interessada ebbia e semper in manera chi siat garantida sa distàntzia mìnima cunsentida de unu metru tra pare;
-sos dipendentes depent èssere reperìbiles pro sas atividades essentziales e in casu de netzessidade o urgèntzia, dae su lunis a sa chenàbura in s'oràriu normale de traballu, e tenende semper in contu cantu disponet sa normativa in sos casos de emergèntzia;
-pro sas urgèntzias tocat a telefonare a custu nùmeru 0783 69026 in oràriu de ufìtziu,
-o s'in casu iscrìere a custos indiritzos de posta eletrònica:

claudio.zago@comunenughedusv.it

protocollo.nughedusv@pec.comunas.it

1.UFÌTZIU AFÀRIOS GENERALES- UFÌTZIU DE SU SÌNDIGU- SEGRETÀRIU COMUNALE

Referente Claudio Zago

claudio.zago@comunenughedusv.it

affarigenerali.nughedusv@pec.comunas.it

2. SERVÌTZIOS SOTZIALES

Referente Dr. Caddeo Giuseppina

giuseppina.caddeo@comunenughedusv.it

affarigenerali.nughedusv@pec.comunas.it

3. UFÌTZIU TÈCNICU

Referente Geom. Paolo Pirri

paolo.pirri@comunenughedusv.it

tecnico.nughedusv@pec.comunas.it

4. SERVÌTZIOS DEMOGRÀFICOS

Referente Sig. Maria Cabono

maria.caboni@comunenughedusv.it

protocollo.nughedusv@pec.comunas.it

6. SERVÌTZIOS FINANTZIÀRIOS

Referente Sig. Claudio Zago

claudio.zago@comunenughedusv,it

affarigenerali.nughedusv@pec.comunas.it

b) fintzas a su 3 de abrile 2020 comente narat su D.P.C.M. 22 de martzu 2020, francu dispositziones noas, segundu sos inditos de sos òrganos de gestione de s'emergèntzia sunt cunsideradas ''atividades indiferìbiles de fàghere in presèntzia'' sas chi sighint:

-atividade de sa Protetzione Tzivile;

- atividade de sa Politzia Munitzipale;

- atividade de s'Istadu Tzivile;

- atividade de sos Servìtzios Sotziales de urgèntzia (assistèntzia a sos antzianos, minores e gente chi tenet netzessidade, etc.);

- atividade de su protocollu;

-atividades urgentes de su Servìtziu finantziàriu (impènnios de ispesa, atzertamentos de intradas, licuidatziones, etz.), de su Servìtziu Resursas Umanas (istipèndios, presèntzia, traballu in rete, etz.) de su Servìtziu Tributos (atividade de pagamentos);

- atividade de gestione e manutentzione de sos servìtzios informàticos;

- atividade de consulèntzia e coordinamentu de sa Segreteria Generale;

- atividade de manutentzione de sas infrastruturas pùblicas si ddoe podet àere perìgulu pro sa salude pùblica;

-atividade de gestione de base de s'igiene pùblica, de sos logos pùblicos e de sa regorta de s'àliga;

-atividades ligadas a sa manutentzione istraordinària e urgente de logos, impiantos o arredos pùblicos, in casu de perìgulu pro sa seguresa de sas persones;

c) totu sas àteras atividades de cumpetèntzia comunale s'ant a fàghere:

- in smart working, traballu lèbiu, tenende contu ca sos dipendentes ant a èssere reperìbiles;

-in Comune, dae sos dipendentes seberados dae sos responsàbiles de àrea, dende atentzione manna a sa pròpia salude e a sa de sos àteros, traballende in manera chi sos tzitadinos, su cantu podent, fatzant a mancu de essire dae domo pro andare a comune e de atopare àtera gente;

d) sos responsàbiles de àrea ant a individuare nessi unu dipendente chi a turnu siat in ufìtziu pro sas atividades indiferìbiles chi amus numenadu in antis; totu sos àteros dipendentes, chi ant a traballare in domo (''traballu lèbiu'' o ''smart working''), depent abarrare a dispositzione dae domo issoro e, in s'oràriu de traballu, e tenent s'òbligu de èssere reperìbiles ca podent èssere tzirriados in casu de netzessidade, e intro de 40 minutos a pustis de sa telefonada retzida depent èssere in su logu de traballu. Custu cumandu in disponibilidade pro emergèntzia, comente disponet s'art. 19 de su D.L. 9/2020 est unu ''servìtziu fatu a totu sos efetos de lege'', est a nàrrere ca chie non ddu respetat at a èssere punidu a norma de lege;

e) sos dipendentes in servìtziu ebbia sighint a timbrare sas presèntzias comente in antis, sos oràrios chi si faghent sighende custu provedimentu ant a èssere recuperados e regulados cun dispositziones fatas a posta cando finit s'emergèntzia sanitària;

f) sos responsàbiles de àrea, in base a s'organizatzione de sos ufìtzios e cunsideradas sas maneras operativas mìnimas netzessàrias pro fàghere su traballu lèbiu o smart working ant a pòdere detzìdere de pònnere in fèrias sos dipendentes chi non tenent possibilidade de traballare in cussa manera;

g) sos responsàbiles de àrea pro pòdere fàghere cantu disponet custu decretu e organizare s'atividade comente mègius podent, sunt cumandados in regime de traballu lèbiu (smart working) istraordinàriu in sas dies de mèrcuris su 25 de martzu e jòbia su 26 de martzu. In custas duas dies totu sos àteros dipendentes sunt in cungedu in contu de fèrias chi teniant de nche finire. Custu decretu at a èssere esecutivu a cumintzare dae su 27 de martzu.

h) Custu provedimentu s'at a pòdere prorogare e/o revocare in casu essant àteros provedimentos dae su guvernu natzionale o regionale.

Su sìndigu at dispostu fintzas chi custu provedimentu esseret publicadu immediatu in s'Albu Pretòriu On-Line de su comune e in sa prima pàgina de su situ istitutzionale; mandadu a sos òrganos de cumpetèntzia territoriale: Prefetura, Presidèntzia de sa regione Sardigna; Dipartimentu de preventzione de sa ASL cumpetente, Cumandu de s'Istatzione de sos Carabineris,

-a sos responsàbiles de àrea chi si depent incurare de informare a totu su personale dipendente e de fàghere a ischire totu sas dispositziones issoro e segundu sas cumpetèntzias ispetzìficas de gestione artt. 107 e 109, comma 2 de su D.Lgs de su 18 de austu 2000, n.267,

-a su Segretàriu comunale.

Su Sìndigu

FAGHET A ISCHIRE a totu sos interessados ca si podet fàghere ricursu contra de custu provedimentu a su Tribunale Amministrativu Regionale de sa Sardigna intro de 60 dies dae cando est istadu publicadu in s'Albu Pretòriu, o a su Presidente de sa Repùblica intro de 120 dies dae sa publicatzione.

Decretu n.1 de su 24 de martzu/2020

A.F.

Pro èssere semper informados e agiornados in contu de s'emergèntzia sanitària dae Coronavirus, cussigiamus a totus de intrare in sos sitos ufitziales de su Ministeru de sa Salude, de sa Presidèntzia de su Cussìgiu de sos Ministros, de sa Regione Autònoma de Sardigna chi nos dant semper sas informatziones giustas e in ue podimus agatare totu sas dispositziones, sas ordinàntzias e sos DPCM essidos finas a como pro cuntènnere e gestire s'emergèntzia. In su situ de su comune si nde podet iscarrigare su mòdulu pro s'autotzertificatzione agiornadu a su 24 de martzu 2020.

A.F.

Emergèntzia Coronavirus: avisu de su Sìndigu

Su Sìndigu


Faghet a ischire


Chi su Presidente de su Cussìgiu Giusepe Conte, at firmadu su decretu nou cun mesuras prus restritivas pro totu su territòriu natzionale, pro cumbàtere e cuntènnere sa difusione de su Coronavirus.
Si domandat a totu sa populatzione de respetare sos inditos de su decretu nou, chi nche cantzellat cussos de in antis de su 1 e de su 4 de martzu, e si recumandat de sighire sas mesuras de preventzione igiènicu-sanitària chi agatades in s'allegadu 1. Faghimus presentes unas cantas dispositziones de sighire ònnia die, chi narant de firmare siat in sos logos pùblicos che in cussos privados:

-sas manifestatziones, sos eventos, sos ispetàculos de diferentes genias,

-sas atividades de sos pub, de sas iscolas de ballu, de sas salas de giogos, discotecas e locales de sa matessi genia;

-sas tzerimònias tziviles e religiosas, e fintzas sos interros.

In sos tzilleris e in totu sas atividades cummertziales sos meres devent fàghere respetare sa distàntzias de seguresa e faghet intrare sos clientes a pagu a pagu. Si recumandat de fàghere a mancu de essire si no est pro netzessidade, de no atopare àtera gente né trumas de gente pro cuerrare sos chi sunt prus dèbiles. Custas chi amus nadu sunt unas cantas mesuras de sighire chi agatades iscritas in su decretu. Tocat a non ismentigare ca onniunu de nois tenet una responsabilidade personale e sotziale e tenet s'òbligu de cuerrare non sa salude sua ebbia ma cussa de totu sa comunidade in ue bivet, faghende totu sas cosas cussigiadas chi podent èssere de agiudu pro firmare sa difusione de su virus.

Chie non ponet in mente a sos òbligos de su DPCM de su 8 de martzu 2020 at a èssere dennuntziadu cunforme a s'artìculu 650 de su còditze penale.

Su DPCM ddu agatades publicadu in su situ de su guvernu e finas in cussu de su comune.

Su Presidente de sa Regione Sardigna in s'Ordinàntzia n.4 narat ite sunt obligados a fàghere sos chi sunt torrende dae sa Lombardia o dae àteras provìntzias a rìschiu de coronavirus:

· depent informare de custa cosa a su dotore issoro;

· abarrare isulados pro 14 dies;

· non podent viagiare né essire;

· depent abarrare in unu logu in ue siat fàtzile a ddos agatare in casu de unu controllu;

· depent nàrrere s'indiritzu de su logu in ue ant a abarrare in isulamentu.

Su Comune de Nughedu domandat a totu sos tzitadinos chi custas dispositziones siant respetadas e faghet a ischire chi:

-sas atividades de sos tzentros de agregatzione sotziale ant a abarrare firmas finas a su 15 de martzu;

-domandat a totu sos tzitadinos de non lòmpere a comune in pessona si non est pro cosa urgente meda e chi non si nde potzat fàghere a mancu. Pro totu sos àteros servìtzios tocat a telefonare o a iscrìere a sa posta eletrònica tzertificada (PEC)

-In comune s'at a pòrrere intrare a unos a unos in manera chi non ddu apat gente meda totu paris.

Pro àteras informatziones e pro bìere su DPCM podides intrare a su situ de su comune de Nughedu o a su de su Guvernu.

DPCM 8 martzu 2020

Ordinàntzia RAS n.4/2020

A.F.

Retìfica avisu pùblicu pròroga presentatzione domandas REIS

Su Responsàbile de sos Servìtzios Sotziales faghet a ischire chi sa presentatzione de sas domandas pro sas modalidades de atuatzione de sa lege regionale n.18 de su 2016: Rèdditu de inclusione Sotziale - Fundu regionale pro su Rèdditu de inclusione Sotziale- ''Agiudu torrau REIS 2019-2020'' est prorogada a su 31 de martzu 2020 a sa una (h.13.00)

Retìfica

A.F.

Progetos personalizados pro malàidos cun disabilidade grave

S'Ufìtziu Servìtzios Sotziales dat a ischire chi si podent presentare sas domandas pro sos progetos personalizados pro malàidos cun disabilidade grave, a tenore de sa L. 162/1998.

Sa disabilidade devet èssere tzertificada intro de su 31/12/2019 a tenore de sa L. 104/1992 e tocat a presentare sos documentos chi sighint:

- ISEE 2020;

- ischeda de sa salude (allegadu B), chi est òbligu pro sos progetos noos;

- ischeda sotziale (allegadu C);

- decraratzione sostitutiva de tzertificatzione (allegadu D), in ue cheret postu cantu s'est retzidu pro su matessi progetu in s'annu 2019;

- fotocòpia documentu de identidade e còditze fiscale (de chie faghet sa domanda e de su malàidu destinatàriu de su progetu);

- tzertificadu chi atestat chi su familiare tenet oras de permissu retribuidu ex L. 104/1992;

- tzertificadu de disabilidade.

Sas domandas cherent presentadas intro de su 28/02/2020.

Sos mòdulos si podent pedire in Comune o iscarrigare dae su link chi sighit: https://comunenughedusv.it/index.php/tzente/articoli/157.

(GFP)

Eliminatzione barrieras architetònicas

S'Ufìtziu Servìtzios Sotziales dat a ischire chi si podet presentare domanda pro tènnere contributos pro eliminare sas barrieras architetònicas in sas domos privadas, a tenore de sa L. 13/1989 e L. 32/1991.

Sas domandas cherent presentadas intro de sa prima die de martzu 2020 a sos ufìtzios comunales.

Sos mòdulos si podent pedire in Comune o iscarrigare dae su link chi sighit: https://comunenughedusv.it/index.php/tzente/articoli/158.

(GFP)

XIII editzione de su cuncursu enològicu de su binu ruju

Sàbadu 25 de maju 2019 s'at a fàghere in Nughedu sa de XIII editziones de su cuncursu enològicu de su binu ruju.

A sas 4 de sero (h 16,00) s'at a comintzare a assagiare sos binos in su Cunventu betzu de santu Zacu.

A sas 7 e mesa (h 19,30) in sos locales de s'oratòriu betzu s'ant a premiare sos mègius binos.

A sas 8 e mesa (h 20,30) b'at a èssere sa chena. Sa cuota pro partetzipare est de 20 èuros peròmine e cheret dada in Comune intro de sas 5 e mesa (h 17,30) de chenàbura 24 de maju 2019).

Regulamentu:

- sunt ammìtidos a su cuncursu sos binos rujos de produtzione domèstica (non professionale);

- s'àghina podet bènnere dae cale si siat logu;

- chie partètzipat devet presentare 2 ampullas de 0,75 pro ogni binu ruju chi cheret presentare;

- sas ampullas benint numeradas a sa cunsigna. Sa cummissione e sos propietàrios las retzint in forma anònima;

- sos binos cherent presentados dae sas 3 a sas 7 (h 15,00-19,00) de chenàbura 24 de maju 2019 in su cunventu betzu de santu Zacu;

- su propietàriu, cunsignende su binu, devet versare sa cuota de 20 èuros chi balet comente billete de iscritzione a sa chena;

- sas ampullas las dat s'Amministratzione comunale e si podent ritirare in Comune e in sos locales ''La Baita'' e ''Nois'';

- sa cummissione de valutatzione l'at a formare s'ONAV (Organizatzione Natzionale Assagiatori di Vino) a tenore de sos critèrios suos;

- a pustis de sa degustatzione s'at a formare una graduatòria generale de sos binos a cuncursu;

- sa premiatzione pro sos primos 3 classificados s'at a fàghere a tenore de sa graduatòria finale.

(GFP)

Projetzione de su documentàriu ''365NSV - La vita nel cuore della Sardegna''

Chenàbura 10 de maju a sas 5 e mesa de sero (h 17,30) in s'àula de su Cussìgiu de Nughedu (1° pranu de sa biblioteca comunale, carrera Pietro Nenni) s'at a fàghere sa presentatzione de ''365NSV - La vita nel cuore della Sardegna'', documentàriu multimediale de su registra Vincenzo Lìgios chi faeddat de sa vida cuotidiana in Nughedu: momentos de traballu, de festa, de giogu, de religiosidade filmados in s'intimidade de sas domos, de sa parròchia, de sos bighinados.

Su documentàriu, chi durat 7 oras e mesu, est sa sìntesi de 1000 oras de ripresas fatas in su 2015 pro girare su film ''Le stagioni di Nughedu''. Est su contu de una comunidade chi non cheret mòrrere e chi rivèndicat sas traditziones e sa cultura sua in una vida autèntica a tesu dae sos istereòtipos de sa narratzione turìstica.

Ant a intervènnere su sìndigu Francesco Mura e su regista Vincenzo Lìgios.

(GFP)

In Nughedu sos over 70 non pagant sa Tari

Sos betzos solos no ant a pagare s'arga. L'at detzisu su sìndigu de Nughedu Francesco Mura paris cun sa Giunta e como ant a passare sa proposta a su Cussìgiu comunale.

''Nch'at betzos meda chi bivent solos cun una pensione mìnima. - narat Mura - Su prus de sas bortas sunt viudos e sos fìgios nche sunt in continente (o in èsteru) in chirca de fortuna''.

Pro chircare de los agiudare in custa situatzione de dificultade s'Amministratzione at detzisu de no lis fàghere pagare sa Tari.

S'esentzione est pro chie tenet prus de 70 annos e s'agiunghet a s'esentzione dae sa Tasi (''Tassa sui servizi indivisibili'') chi esistit giai dae carchi annu.

''Est importante a nàrrere - sighit su sìndigu - chi custa agevolatzione pro sos betzos non faghet crèschere sas tassas pro sos àteros abitantes e custu pro more de su mètodu de càrculu propostu dae su Fiscu, chi permitit de abacare sa tassa pro una cuota chi non devet sobrare su 7 pro chentu de su totale de s'ispesa de su servìtziu comunale''.

Leghe s'artìculu de La Nuova Sardegna

(GFP)

Nadale nughedesu 2018

S'Amministratzione comunale de Nughedu paris cun sos Servìtzios sòtziu-assistentziales bos invitat a partetzipare a sas atividades organizadas pro su Nadale 2018.

Su calendàriu est su chi sighit:

- Domìniga 23 de nadale a sas 6 e mesa de sero (h 18,30) in sa crèsia parrochiale: cuntzertu de Nadale (progetu ''Nativitas'').

- Sàbadu 29 de nadale a sas 3 de sero (h 15,00) in dae in antis de sa biblioteca comunale: atividade de animatzione pro pitzinnos ''Sa domita de Babbu Nadale''.

- Lunis 31 de nadale dae sas 10 de mangianu: ''Su Pandelonzu'' cun atividades de animatzione pro pitzinnos.

- Lunis 31 de nadale a sas 9 de sero (h 21,00) in s'oratòriu betzu: chena de fine de annu cun mùsica de su grupu Bayla Sardinia. Chie tenent praghere de partetzipare si devet iscrìere in Comune intro de su 19 de nadale; sos mannos pagant 20 èuros e sos pitzinnos 10 èuros.

- Giòbia 3 de ghennàrgiu: gita a Busache pro bìere sa bidda de Babbu Nadale. Si pagat 10 èuros e s'abarrat a mandigare in ie (pro su biàgiu bi devent pensare sos genitores).

- Chenàbura 4 de ghennàrgiu a sas 9 e mesa de sero (h 21,00) in s'oratòriu betzu: tòmbola pro totu sa bidda.

(GFP)

Bonus ìdricu -Annu 2017

Su responsàbile de su Servìtziu Sotziale dat a ischire chi si podet fàghere domanda pro otènnere s'agevolatzione pro sa pagamenta de s'abba relativa a s'annu 2017.

Podet presentare domanda chie tenet sas caraterìsticas chi sighint:

- residèntzia in Nughedu;

- residèntzia in sa domo pro sa cale faghet sa domanda (chi siat domo mono-familiare o apartamentu in condomìniu);

- ISEE 2018 chi non sobret sos 20 mìgia èuros;

- faturas de s'abba pro s'annu 2017 (pagadas o sena pagare).

Sas domandas cherent presentadas intro de su 14/12/2018 compilende sos mòdulos chi s'agatant in Comune (ufìtziu de sos Servìtzios Sotziales) e in su situ istitutzionale.

Tocat a b'allegare sa tzertificatzione ISEE 2018 e sa fotocòpia de unu documentu de reconnoschimentu.

(GFP)

Su sìndigu Mura ponet fogu a s'abba

Pro protestare contra a Abbanoa, su sìndigu Francesco Mura at postu fogu a s'abba.

Est capitadu lunis 12 de santandria in Nughedu, biddighedda de su Barigadu in ue dae paritzos annos s'abba de unas sessanta famìllias de su bighinadu ''Arzolas'' est calende in colore de ruìngiu e non b'at mèdiu de la pòdere bufare ne impreare pro coghinare. Tocat a comporare s'abba in butega o a la leare in sos càntaros pùblicos, ma sa gente manna tenet dificultade a la trasportare.

''Sa nostra est una provocatzione, ca custa abba ruja no la cherimus prus'' narat su sìndigu.

No est sa prima borta chi Mura faghet una protesta plateale: chimbe annos in antis pro protesta aiat allutu su fogu in pratza pro fàghere sinnales de fumu. A cussu tempus, difatis, in Nughedu non b'aiat ripetidore e sos telefoneddos non retziant.

Cussa prima protesta fiat serbida a megiorare sas cosas, e s'isetu est de otènnere resurtados finas custa borta, mancari Abbanoa apat ispiegadu chi su problema est in sas retes ìdricas fatas de tubos de chimbanta annos chi diant chèrrere cambiados. S'ant a cambiare, narat, a tenore però de su dinari chi si tenet.

(GFP)

Tzensimentu de sa populatzione

Dae su 13 de santugaine a su 23 de santandria 2018 s'Istitutu natzionale de istatìstica (Istat) est faghende su Tzensimentu permanente de sa populatzione e de sas domos. Dae ocannu s'at a fàghere onni annu (non prus onni deghe) cun rilevatziones istatìsticas 'a campione' e Nughedu est una de sas biddas seletzionadas. Sas informatziones ant a abarrare riservadas, non s'at a ischire a chie sunt riferidas ca sos resurtados benint istudiados in forma agregada.

COMENTE RISPÒNDERE A SU CUESTIONÀRIU

Unu rilevadore at a andare dae domo in domo dae su 13 de santugaine a su 23 de santandria. At a portare unu tablet e unu tesserinu pro lu reconnòschere.

PRO INFORMATZIONES SI PODET

· Telefonare a su nùmeru gratùitu Istat 800 811 177 (dae sas 9 de mangianu a sas 9 de sero)

· Iscrìere a s'indiritzu censimentipermanenti.popolazioneareale@istat.it

· Consultare su situ www.istat.it/it/censimenti-permanenti/popolazione-e-abitazioni.

(GFP)

Asseguratzione contra a sas temporadas - Annu 2018

Si dat a ischire a totu sos imprendidores agrìculos chi dae s'8 a su 31 de su mese de santugaine 2018 si podet fàghere s'asseguratzione pro sas colturas de atòngiu e de ierru 2018-2019.

Pro more de unu contributu pùblicu custas asseguratziones tenent su 70% de costu in mancu. Pro lu pòdere otènnere tocat a

- Èssere imprendidores agrìculos cun partida IVA iscritos a sa Càmera de Cummèrtziu;

- Andare a su Tzentru de Assistèntzia Agrìcula a agiornare (o fàghere dae nou) su fascìculu aziendale;

- Preparare su PAI/Manifestatzione de interessu pro sos produtos de assegurare;

- Firmare su tzertificadu de asseguratzione;

- Allegare a su PAI sos documentos chi cumprovant de l'àere retzidu e sos documentos de identidade.

Si podent assegurare sos agrùmenes, sa cartzofa e s'ortalìtzia dae su gràndine, su bentu, s'abba meda e sos undamentos, sa ghilighia, su nie, sa sicagna, sos càmbios de temperadura improvisos.

S'avisu cumpletu si podet iscarrigare dae su situ de su Comune de Nughedu (http://www.albo.tinnservice.com:8080/?ente=00535660955).

Sos crarimentos si podent pedire in s'ufìtziu de Viale Brianza 46 in Aristanis (tel. 0783-296040 - tzell. 349-6582238 - mail: condifesa.oristano@asnacodi.it - web: www.condifesaor.it).

(GFP)

Contributos a privados pro bonìficas dae s'amiantu

Si dat a ischire chi dae su situ de su Comune de Nughedu si podet iscarrigare sa modulìstica pro partetzipare a su bandu chi permitit a sos tzitadinos de nche bogare s'amiantu dae sas domos e dae sos immòbiles situados in territòriu de sa provìntzia de Aristanis.

Sa Provìntzia at retzidu pro custu iscopu 157.575,77 èuros dae s'Assessoradu regionale a sa Difesa de s'Ambiente (L.R. 22/2005, D.G.R R.A.S n° 48/48 de su 17.10.2017).

Chie cheret iscarrigare sos mòdulos si podet cullegare a sa pàgina http://www.comunenughedusv.it/index.php/tzente/articoli/101 (situ de Nughedu).

(GFP)

torna all'inizio del contenuto
torna all'inizio del contenuto