Vai a sottomenu e altri contenuti

S’arte de su ricamu in Busache e sa coltivatzione de su linu

S'arte de su ricamu rapresentat s'aspetu prus importante de s'artesanadu de Busache. Leat orìgine dae sa coltivatzione de su linu chi, in sos annos colados, fiat praticada meda e at resu sa bidda de Busache famada meda in tota sa Sardigna. A dies de oe su linu non si coltivat prus, si no in àmbitu familiare, ma su ricamu est un'atividade semper presente e est una fonte de rèdditu pro sas fèminas busachesas. Sa coltivatzione de su linu previdiat tantas fases de traballu: si preparaiat su terrinu cun duas araduras a su cumintzu de s'atòngiu pro semenare. A pustis de unu mese, pagu prus o mancu, naschiant sas prantigheddas e in su mese de abrile sos campos de linu fiant totu froridos. Sas prantas si innetaiant dae s'erba e a pustis si nde tiraiant dae sa raighina e si prendiant a dòighi a dòighi. Si iscudiat su linu pro nde fàghere essire su sèmene. Sos òmines portaiant su linu, in carru, a su frùmene e si lassaiat in mesu s'abba. A pustis si poniat a assutare in su sole e si dividiat sa fibra dae sas iscòrias. In ùrtimu si faghiant totu sas operatziones pro lu pòdere filare e tèssere e impreare pro fàghere tantas cosas bellas e de valore mannu. Si faghiant tipos meda de pannu: su prus pregiadu s'impreaiat pro lentolos e tiàgias, (chi poi si impretziosiant cun ricamos) e cun sos àteros pannos si faghiant bestires, mantas e àteras cosas de impreare onni die. Sas tènnicas de ricamu prus usadas fiant: su puntu antigu (a contu), s'isfiladu sardu e sicilianu, sas isfiladuras (ispighitas), s'intàgliu, su ''punto croce'', su puntu ''assisi'' e àteros. Sos disinnos ricamados si ripitiant bortas meda. In su puntu antigu, pro esèmpru, si faghiant isteddos e rombos (su pistocu ‘e gancios e su pistocu ‘e bator antas), in totu sa roba de su corredo. In s'isfiladu si faghiant frores (pro su prus rosas) o fruta (sa fògia de sa bide e s'àghina). Cun s'intàgliu si faghiat s'ispiga de su trigu e frores (sa minestra ‘e isprones, su trapadillu froriu e àteros).

(M.G.S.)

torna all'inizio del contenuto
torna all'inizio del contenuto